PM SHRI திட்டத்துக்கு முழு நிதியையும் மத்திய அரசு வழங்குகிறது- அண்ணாமலை ஆணித்தரமாக சொன்னது உண்மையா?

சென்னை: PM SHRI திட்டத்துக்கான நிதி முழுவதும் மத்திய அரசு வழங்குவதாகவும், மாநில அரசு எந்த நிதியும் அளிக்கவில்லை என்று தமிழ்நாடு பாஜக தலைவர் அண்ணாமலை தெரிவித்தது தவறான தகவல் என்று தமிழ்நாடு அரசின் உண்மை சரிபார்ப்பு குழு தெரிவித்துள்ளது.

இது தொடர்பாக தமிழ்நாடு அரசின் உண்மை சரிபார்ப்பு குழு கூறியிருப்பதாவது: PM SHRI நிதி முழுவதும் மத்திய அரசு வழங்குவதில்லை. 60:40 என்ற அடிப்படையில் 60% ஒன்றிய அரசும், 40% மாநில அரசும் பங்கிட்டுக் கொள்கின்றன. (திட்டத்தின் மொத்தத் தொகை - ரூ27,360 கோடி, மத்திய அரசு பங்கு ரூ18,128 கோடி)

இத்திட்டத்தின் கீழ் நாடு முழுவதும் மொத்தம் 14,500 பள்ளிகள் தேர்ந்தெடுக்கப்படும். இதில், மத்திய அரசால் நடத்தப்படும் கேந்திரிய வித்யாலயா மற்றும் நவோதயா பள்ளிகளும் அடங்கும். இத்திட்டத்துக்கான மத்திய அரசின் 60% பங்கும் 5 வருடங்களுக்கு மட்டுமே வழங்கப்படும். 2022 - 2023 முதல் 2026 - 2027 வரை மட்டுமே நிதியுதவி வழங்கப்படும். அதன் பின்னர் அந்த பள்ளிகளுக்கான முழு செலவுகள் அனைத்தையும் அந்தந்த மாநிலங்களே பார்த்துக்கொள்ள வேண்டும்.

PM SHRI பள்ளிகளுக்கு முழு நிதியும் மத்திய அரசு வழங்குகிறது, இத்திட்டத்தின் கீழ் 16,000 பள்ளிகள் தேர்ந்தெடுக்கப்படும் என்று அண்ணாமலை சொன்னது தவறான தகவல். இவ்வாறு தமிழ்நாடு அரசின் உண்மை சரிபார்ப்பு குழு தெரிவித்துள்ளது.

அண்ணாமலை கூறியிருந்தது என்ன?

PM SHRI பள்ளிகள் தொடர்பாக செய்தியாளர்களிடம் பேசிய அண்ணாமலை, PM SHRI என்பது 16,000 பள்ளிகூடங்கள். இதில் முழுமையாக மத்திய அரசு நிதி உதவி கொடுத்து தேவையான அனைத்து உட்கட்டமைப்புகளையும் உருவாக்கி அதில் முழுமையாக தேசிய கல்விக் கொள்கையை கொண்டு வருவதுதான். தமிழ்நாட்டில் இருக்கக் கூடிய ஒரு பள்ளிக்கூடத்தை எடுத்து போர்டை கழற்றிவிட்டு PM SHRI என்றெல்லாம் யாரும் மாட்டவில்லை; அதற்கான எல்லா நிதியும் மத்திய அரசுதான் கொடுக்கிறது. தமிழ்நாட்டின் எந்த ஒரு பள்ளியையும் எடுத்து PM SHRI திட்டம் செயல்படுத்தப்படவில்லை. இதை வேண்டுமானால் தமிழ்நாடு அரசையே தெளிவுபடுத்த சொல்லுங்கள் என்றார்.

பேக்ட் செக் தொடர்பான உங்களது ஆலோசனைகளையும் சொல்லுங்கள். அனுப்ப வேண்டிய இ மெயில் - [email protected]

English summary

The Tamil Nadu government's fact-checking team has stated that BJP Tamil Nadu President Annamalai's claim—that the UGovernment fully funds the PM SHRI scheme and that the State Government does not contribute any funds—is false.