Fact Check: வாக்காளர் பட்டியலில் பெயர் இல்லாவிட்டாலும் ஓட்டு போடலாமா? எப்படி? உண்மை என்ன?

சென்னை: வாக்காளர் பட்டியலில் பெயர் இல்லாவிட்டாலும் இந்தியர்கள் தேர்தலில் வாக்களிக்கலாம் என பெண் ஒருவர் பேசும் வீடியோ சமூக வலைதளங்களில் பரவி வருகிறது. இதன் உண்மைத்தன்மை குறித்துப் பார்க்கலாம்.

லோக்சபா தேர்தல் நாடு முழுவதும் வரும் ஏப்ரல் 19 தொடங்கி, ஜூன் 1ஆம் தேதி வரை 7 கட்டங்களாக நடைபெற உள்ளது. வாக்கு எண்ணிக்கை ஜூன் 4ஆம் தேதி நடைபெற உள்ளது. தமிழ்நாட்டில் வரும் ஏப்ரல் 19ஆம் தேதி ஒரே கட்டமாக வாக்குப்பதிவு நடைபெறுகிறது. லோக்சபா தேர்தல் நெருங்குவதையொட்டி அரசியல் களம் சூடுபிடித்துள்ளது.

பரவி வரும் தகவல்: இது ஒருபுறம் இருக்க தேர்தல் தொடர்பான போலிச் செய்திகளும் பரப்பப்பட்டு வருகின்றன. அந்தவகையில், இந்திய தேர்தல்களின்போது வாக்காளர் பட்டியலில் பெயர் இல்லாவிட்டாலும் இந்தியர்கள் தேர்தலில் வாக்களிக்கலாம் என பெண் ஒருவர் பேசும் வீடியோ சமூக வலைதளங்களில் பரவி வருகிறது.

அதில், வாக்காளர் பட்டியலில் உங்கள் பெயர் இல்லை என்றால், 49A பிரிவின் கீழ் வாக்குச் சாவடியில் உள்ள அலுவலரிடம் ஆதார் அட்டையைக் காட்டி வாக்களிக்க எனக்கு உரிமை உள்ளது எனக் கோரி வாக்களிக்கலாம் எனத் தெரிவிக்கப்பட்டுள்ளது.

உண்மை என்ன?: வாக்காளர் பட்டியலில் பெயர் இல்லாத குடிமக்கள், வாக்குச் சாவடியில் ஆதார் அட்டையைக் காட்டி, பிரிவு 49A-ன் கீழ் வாக்களிக்கலாம் என்ற கூற்று தவறானது. இந்திய தேர்தல் ஆணையத்தின் விதிப்படி, வாக்களிக்க ஒரு குடிமகனின் பெயர் வாக்காளர் பட்டியலில் கட்டாயம் இடம் பெற்றிருக்க வேண்டும்.

வாக்காளர் பட்டியலில் பெயர் இருந்தும் உங்களது வாக்காளர் அட்டை காணாமல் போயிருந்தால் வாக்களிக்கலாம். தேர்தல் ஆணையம் பட்டியலிட்டுள்ள 14 புகைப்பட அடையாள அட்டைகளில் ஏதேனும் ஒன்றைக் காட்டி வாக்களிக்கலாம். ஆனால், இது அவர்களின் பெயர் வாக்காளர் பட்டியலில் இருக்கும் சூழலில் மட்டுமே.

உங்க பெயர் இருக்கா? இல்லையா?: வாக்காளர் பட்டியலில் தங்கள் பெயர் உள்ளதா என்பதை, தேர்தல் ஆணையத்தின் இணையதளம் மற்றும் மொபைல் ஆப் வழியே அறிந்து கொள்ளலாம். அனைத்து வாக்காளர்களுக்கும், தேர்தல் ஆணையம் சார்பில், 'பூத் சிலிப்' வழங்கும் பணி நடந்து வருகிறது.

பூத் சிலிப் கிடைக்காதவர்கள், தங்கள் பெயர், வாக்காளர்கள் பட்டியலில் உள்ளதா, தங்கள் ஓட்டுச்சாவடி அமைந்துள்ள இடம் போன்ற விபரங்களை, www.elections.tn.gov.in, voters.eci.gov.in ஆகிய இணையதளங்களிலும், 'voter Helpline' என்ற மொபைல் போன் செயலியிலும் பார்த்து தெரிந்து கொள்ளலாம்.

English summary

The claim that citizens whose names are not on the voters list can ask for a vote under Section 49A by showing their Aadhaar card at the polling booth is false.