காசு போட்டவங்களுக்கு கல்தா.. வேலையை காட்டிருச்சே தங்கம்! படக்கென சரிந்த விலை! அமெரிக்கா தான் காரணம்!
சென்னை: சர்வதேச சந்தையில் தங்கத்தின் விலை இன்று (செவ்வாய்க்கிழமை) சற்று சரிவை சந்தித்தது. கடந்த இரண்டு வாரங்களில் இதுவரை இல்லாத அளவுக்கு உயர்ந்திருந்த தங்கத்தின் விலை, தற்போது முதலீட்டாளர்கள் அமெரிக்க மத்திய வங்கியான ஃபெடரல் ரிசர்வ் வங்கியின் முடிவுக்காக எதிர்பார்த்து காத்திருப்பதால் லாபப் பதிவு (Profit Booking) காரணமாக சற்று சரிந்துள்ளது.
இன்றை சந்தை நிலவரப்படி, ஸ்பாட் கோல்ட் (Spot Gold) விலை ஒரு அவுன்ஸுக்கு 0.6 சதவீதம் குறைந்து 4,138.32 டாலராக வர்த்தகமானது. அதேபோல் ஆகஸ்ட் மாத அமெரிக்க தங்க ஃபியூச்சர்ஸ் விலையும் 0.4 சதவீதம் குறைந்து 4,149.90 டாலராக இருந்தது.
விலை சரிவு தொடர்பாக சந்தை நிபுணர்கள் கூறுவதாவது," கடந்த வாரம் முதல் தங்கம் ஒரு குறிப்பிட்ட ஆதரவு விலையை உருவாக்கும் நிலையில் உள்ளது. ஆனால் அடுத்த கட்டமாக தங்கத்தின் விலையை தீர்மானிப்பது அமெரிக்க ஃபெடரல் ரிசர்வ் வங்கியின் கூட்டம் தொடர்பான முடிவுகள் தான்.
கெவின் வார்ஷ்
குறிப்பாக புதிய ஃபெட் தலைவர் கெவின் வார்ஷ் தலைமையில் நடைபெற்ற முதல் கூட்டத்தின் குறிப்புகள் வெளியாவதால் உலக முதலீட்டாளர்கள் மிகுந்த கவனத்துடன் காத்திருக்கின்றனர். ஜூன் 16 மற்றும் 17-ஆம் தேதிகளில் நடைபெற்ற அமெரிக்க மத்திய வங்கியின் கூட்டக் குறிப்புகள் புதன்கிழமை வெளியாக உள்ளன. இந்த குறிப்புகளில் வட்டி விகிதம் தொடர்பாக எதிர்காலத்தில் என்ன முடிவுகள் எடுக்கப்படலாம் என்பது குறித்த சிக்னல்கள் இடம்பெறலாம் என்பதால், தங்கம் உள்ளிட்ட சந்தைகள் அதனை உன்னிப்பாக கவனித்து வருகின்றன.
வட்டி விகிதம்
புதிய ஃபெட் தலைவர் கெவின் வார்ஷ், வட்டி விகிதம் தொடர்பான முன்கூட்டிய வழிகாட்டுதல்களை (Forward Guidance) குறைக்கும் வகையில் செயல்பட்டு வருவதாக கூறப்படுகிறது. பொருளாதார சூழ்நிலைக்கு ஏற்ப விரைவாக முடிவெடுக்க இது உதவும் என்று அவர் கருதுகிறார். அதேநேரத்தில் ஃபெட் ஆளுநர் கிறிஸ்டோபர் வாலர், சரியான சூழலில் முன்கூட்டிய வழிகாட்டுதலும் பயனுள்ளதாக இருக்கும் என்று கருத்து தெரிவித்துள்ளார்.
இந்த ஆண்டின் தொடக்கத்தில் அமெரிக்கா-இஸ்ரேல் மற்றும் ஈரான் இடையேயான பதற்றம் காரணமாக பணவீக்கம் அதிகரிக்கும் என்ற அச்சம் உருவானது.
பணவீக்க அச்சம்
இதன் விளைவாக அமெரிக்க டாலர் வலுவடைந்ததுடன், வட்டி விகித உயர்வு எதிர்பார்ப்பும் அதிகரித்ததால் தங்கம் தனது உச்ச விலையிலிருந்து 25 சதவீதத்திற்கும் அதிகமாக சரிந்தது. ஆனால் அண்மையில் போர் நிறுத்த ஒப்பந்தம் ஏற்பட்டதைத் தொடர்ந்து பணவீக்க அச்சம் ஓரளவு குறைந்தது. மேலும், கடந்த வாரம் வெளியான அமெரிக்க வேலைவாய்ப்பு தரவுகள் எதிர்பார்த்ததை விட பலவீனமாக இருந்ததால், உடனடி வட்டி உயர்வு வாய்ப்பு குறைந்துள்ளது. இதனால் திங்கட்கிழமை தங்கம் இரண்டு வாரங்களில் இல்லாத உயரத்தை எட்டியது.
அமெரிக்க ஃபெட்
தற்போது செப்டம்பர் மாதத்தில் அமெரிக்க ஃபெட் வட்டி விகிதத்தை உயர்த்தும் வாய்ப்பு சுமார் 56 சதவீதமாக இருப்பதாக சந்தை மதிப்பிடுகிறது. முன்பு இது 60 சதவீதத்திற்கும் அதிகமாக இருந்தது. வட்டி விகிதம் குறைவாக இருக்கும் சூழலில் வட்டி வருமானம் வழங்காத தங்கத்தில் முதலீடு செய்வது அதிகம் கவர்ச்சிகரமாக இருக்கும் என்பதால், ஃபெட் முடிவுகள் தங்கத்தின் விலையை நேரடியாக பாதிக்கின்றன. இதற்கிடையில், ஹாங்காங் தங்க வர்த்தகத்தை ஊக்குவிக்கும் வகையில் புதிய மத்திய கிளியரிங் அமைப்பை அறிமுகப்படுத்தியுள்ளது.
தங்க ஃபியூச்சர்ஸ்
மேலும், தங்க ஃபியூச்சர்ஸ் வர்த்தகத்தையும் மீண்டும் தொடங்கியுள்ளது. ஆசியாவின் முக்கிய தங்க சேமிப்பு மற்றும் வர்த்தக மையமாக உருவாகும் நோக்கில் இந்த நடவடிக்கைகள் எடுக்கப்பட்டுள்ளதாக கூறப்படுகிறது. மற்ற விலைமதிப்புள்ள உலோகங்களின் நிலவரத்தைப் பார்க்கும்போது, வெள்ளி விலை ஒரு சதவீதம் சரிந்தது. பிளாட்டினம் விலை லேசாக குறைந்த நிலையில், பல்லாடியம் விலை மட்டும் சிறிய அளவில் உயர்வை பதிவு செய்தது.
சர்வதேச உலோக சந்தை
மொத்தத்தில், அமெரிக்க ஃபெட் கூட்டக் குறிப்புகள் வெளியாகும் வரை தங்கம் உள்ளிட்ட சர்வதேச உலோக சந்தையில் ஏற்ற இறக்கம் நீடிக்கும் என சந்தை நிபுணர்கள் கணித்துள்ளனர். குறிப்பாக வட்டி விகிதம் குறித்த புதிய முடிவுகள் வெளியாகும் பட்சத்தில், தங்கத்தின் விலை தீர்மானிக்கப்படும் என்று எதிர்பார்க்கப்படுகிறது.
Click it and Unblock the Notifications
Sign in with Google