Gold Rate Today: தங்கம் விலை இன்று புதிய உச்சம்! ஒரே நாளில் சவரனுக்கு ரூ.3600 உயர்ந்தது! காரணம் டிரம்ப் போட்ட குண்டு

Updated: Tuesday, January 20, 2026, 15:45 [IST]

Subscribe to Oneindia Tamil

சென்னை: தங்கம் விலை நிற்காமல் தொடர்ச்சியாக உயர்ந்தே வருகிறது. சர்வதேச அளவில் நடந்த சில பல மாற்றங்களால் தங்கம் விலை நிற்காமல் உயர்ந்து வருகிறது. நேற்றைய தினம் சர்வதேச சந்தையிலும் தங்கம் விலை உயர்ந்துள்ள நிலையில், இன்று அது இந்தியச் சந்தையிலும் எதிரொலித்துள்ளது. சென்னையில் இன்று காலை தங்கம் சவரனுக்கு ரூ.1280 உயர்ந்த நிலையில், மாலையில் மீண்டும் ரூ.2320 உயர்ந்துள்ளது. ஒரே நாளில் சவரனுக்கு ரூ.3600க்கு விற்பனையாகிறது.

கொரோனாவுக்கே பிறகே ஏழை மற்றும் நடுத்தர மக்கள் வாங்க முடியாத விலைக்குத் தங்கம் போய்விட்டது. கொஞ்சமாவது தங்கம் விலை குறையும் என நினைப்போருக்கு ஏமாற்றத்தையே தங்கம் விலை தொடர்ந்து கொடுத்து வருகிறது. இஎம்ஐ போட்டு தங்கம் வாங்கும் காலம் வந்துவிட்டது என்றே சொல்லலாம். அந்தளவுக்குத் தான் நிலைமை இருக்கிறது.

சர்வதேச சூழல்

இப்போதும் கூட சர்வதேச சந்தையில் தங்கம் விலை உயர்ந்தே வந்துள்ளது. இந்த முறையும் டிரம்ப் தான் காரணம். உக்ரைன் விவகாரத்தில் கேப் விட்டு இருக்கும் டிரம்ப், இப்போது கிரீன்லாந்து பக்கம் திரும்பியுள்ளார். கிரீன்லாந்தை ரஷ்யா அல்லது சீனா ஆக்கிரமிக்க வந்தால் அதை டென்மார்க்கால் (டென்மார்க்கின் ஒரு பகுதி தான் கிரீன்லாந்து) தடுக்க முடியாது. இதனால் அமெரிக்கா வசம் கிரீன்லாந்து ஒப்படைக்கப்பட வேண்டும் என்பதே டிரம்ப் நிலைப்பாடு!

டிரம்ப்

இதற்கு ஐரோப்பிய நாடுகள் கடுமையான எதிர்ப்பு தெரிவித்த நிலையில், டென்மார்க், பிரிட்டன் உள்ளிட்ட நாடுகள் மீது 10% வரியை டிரம்ப் அறிவித்தார். கிரீன்லாந்தை தரவில்லை என்றால் வரி உயரும் என மிரட்டியுள்ளார். அமெரிக்காவின் இந்தச் செயலுக்கு ஐரோப்பிய நாடுகள் கடும் எதிர்ப்பு தெரிவித்துள்ளது. அதேநேரம் கிரீன்லாந்து மீது அமெரிக்கா ராணுவ நடவடிக்கையை எடுத்தால் அது உக்ரைன் மீதான ரஷ்யாவின் செயல் சரி என்பது போல ஆகிவிடும் என்றும் சுட்டிக்காட்டியுள்ளன. ஆனாலும், டிரம்ப் விடுவது போலத் தெரியவில்லை. இதனால் சர்வதேச பதற்றம் உச்சத்தில் இருக்கிறது.

தங்கம் விலை

நேற்றைய தினம் ஒரு சவரன் ஆபரணத் தங்கம் ரூ.1360 உயர்ந்து, ரூ.1,07,600க்கு விற்பனையானது. அதாவது 22 கேரட் தங்கம் ஒரு கிராம் ரூ.170 உயர்ந்து, ரூ.13,450க்கு விற்பனையாகிறது. சர்வதேச சந்தையில் நேற்றிரவு தங்கம் விலை கணிசமாக உயர்ந்த நிலையில், இந்தியாவிலும் அது எதிரொலித்துள்ளது.

சென்னையில் இன்று காலை ஆபரண தங்கம் சவரனுக்கு ரூ.1280 உயர்ந்து, ரூ.1,08,880க்கு விற்பனையானது. ஒரு கிராம் ஆபரண தங்கம் ரூ.160 உயர்ந்து, ரூ.13,610க்கு விற்பனையாகிறது. வெள்ளி விலையும் கிராமுக்கு ரூ.12 உயர்ந்து, ரூ.330க்கு விற்பனை செய்யப்பட்டது.

மீண்டும் உயர்வு

தங்கம் விலை ஒரே நாளில் இரண்டாவது முறையாக மாலையும் உயர்ந்தது. மாலை தங்கம் விலை சவரனுக்கு ரூ.2320 உயர்ந்து, ரூ.1,11,200க்கு விற்பனை செய்யப்படுகிறது. ஆபரண தங்கம் ஒரு கிராம் 13,900க்கு விற்பனையாகிறது. ஒரே நாளில் தங்கம் விலை சவரனுக்கு ரூ.3600 அதிகரித்துள்ளது.. வெள்ளி விலையும் மாலை கிராமுக்கு ரூ.10 உயர்ந்து ரூ.340க்கு விற்பனையாகிறது.