தங்கத்தை விட.. மிக மோசமாக தள்ளாடும் வெள்ளி விலை.. என்ன காரணம்? இப்போது வாங்கலாமா வேண்டாமா?

சென்னை: சீனப் புத்தாண்டு கொண்டாட்டங்கள் காரணமாக ஆசியாவின் முக்கிய நிதிச் சந்தைகள் மூடப்பட்டுள்ளதால், சர்வதேச அளவில் வெள்ளியின் பணப்புழக்கம் (Liquidity) குறைந்து அதன் விலை கடும் ஏற்ற இறக்கங்களைச் சந்தித்து வருகிறது.

தங்கத்தைப் போலன்றி, வெள்ளியின் தேவை பெரும்பாலும் தொழிற்சாலை உற்பத்தியைச் சார்ந்து இருப்பதால், சீனாவின் சந்தை விடுமுறை வெள்ளி விலையில் பெரும் தாக்கத்தை ஏற்படுத்தியுள்ளது. வெள்ளி விலை கடந்த சில மாதங்களாக கடுமையாக சரிந்து வருகிறது. அதிலும் கடைசி சில வாரங்களாக சரிவதற்கு சீனப் புத்தாண்டு கொண்டாட்டங்கள் காரணமாக சந்தை மூடப்பட்டது காரணமாக பார்க்கப்படுகிறது.

"லிக்விடிட்டி வேக்யூம்" (Liquidity Vacuum) - சந்தையில் நிலவும் வெற்றிடம்

சீனாவின் ஷாங்காய் தங்கச் சந்தை (SGE) மற்றும் ஷென்சென் பங்குச் சந்தைகள் பிப்ரவரி 23 வரை விடுமுறை அறிவித்துள்ளன. உலகின் மிகப்பெரிய வெள்ளி நுகர்வோர் நாடான சீனா தற்காலிகமாக சந்தையிலிருந்து விலகியிருப்பது, சர்வதேச அளவில் ஒரு பணப்புழக்க வெற்றிடத்தை உருவாக்கியுள்ளது.

"உலகின் மிகப்பெரிய வெள்ளி வாங்கும் நாடான சீனா சந்தையில் இல்லாதபோது, வர்த்தக அளவு குறைகிறது. இது விலையில் தேவையற்ற மாற்றங்களையும் (Volatility), வாங்குவதற்கும் விற்பதற்கும் இடையிலான விலை இடைவெளியையும் (Bid-Ask Spread) அதிகரிக்கிறது," என மார்க்கெட் ஆய்வாளர்கள் கருதுகிறார்கள்.

தங்கம் தப்பிப்பது எப்படி? வெள்ளி ஏன் வீழ்கிறது?

சர்வதேச சந்தையில் தங்கம் ஓரளவிற்கு நிலையாக இருப்பதற்கும், வெள்ளி சரிவதற்கும் சில முக்கிய காரணங்களை நிபுணர்கள் அடுக்குகின்றனர்:

தொழில்துறை தாக்கம்: வெள்ளி ஒரு முதலீட்டு உலோகம் மட்டுமல்ல, அது சோலார் பேனல்கள் மற்றும் மின்சார வாகனத் தயாரிப்பில் முக்கியப் பங்கு வகிக்கிறது. சீனாவில் தொழிற்சாலைகள் விடுமுறை காரணமாக மூடப்பட்டுள்ளதால் வெள்ளிக்கான தேவை சரிந்துள்ளது.

தங்கத்தின் பலம்: தங்கம் மத்திய வங்கிகளின் இருப்பு மற்றும் பாதுகாப்பான முதலீடாகக் கருதப்படுவதால், ஆசியச் சந்தைகள் மூடியிருந்தாலும் மேற்கு உலக நாடுகளின் முதலீடுகளால் அது தற்காத்துக் கொள்கிறது.

இன்றைய வெள்ளி விலை நிலவரம் (சென்னை - பிப்ரவரி 22, 2026)

சர்வதேச சந்தையின் தாக்கம் உள்ளூர் சந்தையிலும் எதிரொலிக்கிறது. வாரத்தின் தொடக்கத்தில் சரிவைக் கண்ட வெள்ளி, தற்போது மீண்டும் ஒரு மீட்சியை (Rebound) நோக்கி நகர்கிறது.

1 கிராம் வெள்ளி: ₹290

1 கிலோ பார் வெள்ளி: ₹2,90,000

கடந்த சில நாட்களாக ஆட்டம் காட்டி வந்த வெள்ளி விலை, தற்போது ₹2.90 லட்சம் என்ற நிலையில் நிலைபெற்றுள்ளது. மத்திய கிழக்கு நாடுகளில் நிலவும் போர் பதற்றங்கள் காரணமாக முதலீட்டாளர்கள் வெள்ளியை ஒரு பாதுகாப்பான புகலிடமாகப் பார்ப்பதால், விலையில் இந்த திடீர் மீட்சி ஏற்பட்டுள்ளதாகக் கருதப்படுகிறது.

தங்கம், வெள்ளி விலை - நிபுணர்களின் அறிவுரை

தங்கம் மற்றும் வெள்ளி துறை முதலீட்டு நிபுணர்கள் இது தொடர்பாக கூறுகையில், வெள்ளி தற்போது ₹85 மற்றும் ₹90 (சர்வதேச அளவில்) என்ற முக்கிய நிலைகளை நோக்கி நகர்வதாகக் குறிப்பிட்டுள்ளார். சந்தை ஏற்ற இறக்கத்துடன் இருப்பதால், விலை குறையும்போது வாங்குவதும் (Buy-on-dips), உயரும்போது விற்பதுமே (Sell-on-rallies) தற்போதைக்குச் சிறந்த உத்தியாக இருக்கும் என அவர்கள் அறிவுறுத்தியுள்ளனர்.

English summary

Lunar New Year Fallout: Silver Prices Swing in "Liquidity Vacuum" as Asian Hubs Shut Down