அட.. காது அழுக்கில்தான் உயிர் ஒளிந்திருக்காம்! புற்றுநோயை முன்கூட்டியே கண்டுபிடிக்கலாம்: விஞ்ஞானிகள்

By Oneindia Staff

Updated: Tuesday, February 3, 2026, 11:45 [IST]

Subscribe to Oneindia Tamil

வாஷிங்டன்: நமது காதில் சேரும் அழுக்கை நாம் தேவையில்லாத கழிவாகவே கருதுகிறோம். ஆனால், அந்த அழுக்குதான் இனி புற்றுநோயை ஆரம்பத்திலேயே கண்டறிந்து உயிரைக் காக்கப்போகும் ஆயுதம் என்று பிரேசில் நாட்டு விஞ்ஞானிகள் உலகையே வியக்க வைத்துள்ளனர். பிரேசிலின் கோயாஸ் ஃபெடரல் பல்கலைக்கழகத்தைச் சேர்ந்த ஆராய்ச்சியாளர்கள் உருவாக்கியுள்ள 'செருமெனோகிராம்' எனும் இந்தத் தொழில்நுட்பம், காது அழுக்கை ஆய்வு செய்வதன் மூலம் உடலில் புற்றுநோய் செல்கள் இருப்பதை மிகத் துல்லியமாகக் கண்டறிகிறது.

பொதுவாக நம் உடல் ஆரோக்கியமாக இருக்கும்போது காது அழுக்கின் வேதியியல் அமைப்பு ஒரு மாதிரி இருக்கும் என்றும், உடலில் நோய் பாதிப்பு ஏற்பட்டால் அந்த அமைப்பு உடனடியாக மாறிவிடும் என்றும் இந்த ஆய்வின் ஒருங்கிணைப்பாளர் நெல்சன் அந்தோனியோசி விளக்குகிறார்.

ரத்தப் பரிசோதனை போல ஊசி குத்தும் வலி இல்லாமல், மிகக் குறைந்த செலவில், சாதாரண மக்களும் பயன்பெறும் வகையில் இந்த ஆய்வு 2025-ஆம் ஆண்டின் சிறந்த மருத்துவ விருதுகளையும் வென்றுள்ளது. சுமார் 751 பேரிடம் நடத்தப்பட்ட சோதனையில், புற்றுநோய் அறிகுறிகள் இல்லாத 5 பேருக்கு இந்தத் தேர்வு மூலம் நோய் இருப்பது முன்கூட்டியே கண்டறியப்பட்டு பின் உறுதி செய்யப்பட்டது.

தற்போது புற்றுநோயைத் தாண்டி, மனிதர்களை வாட்டும் அல்சைமர் மற்றும் பார்கின்சன் போன்ற மூளை தொடர்பான நோய்களையும் காது அழுக்கு மூலம் கண்டுபிடிக்க முடியுமா என்று இந்த ஆய்வுக் குழு தீவிரமாகச் செயல்பட்டு வருகிறது.

அரசுப் பல்கலைக்கழகங்களின் நிதி உதவியால் மட்டுமே இத்தகைய புரட்சிகரமான ஆய்வுகள் சாத்தியம் என்று கூறும் விஞ்ஞானிகள், விரைவில் இச்சோதனையை உலக அளவில் மக்கள் பயன்பாட்டுக்குக் கொண்டுவரத் திட்டமிட்டுள்ளனர்.

இந்த ஆய்வு காது அழுக்கின் முக்கியத்துவத்தைப் பேசினாலும், மருத்துவர்கள் ஒரு முக்கியமான எச்சரிக்கையை விடுக்கின்றனர். காது அழுக்கைச் சுத்தம் செய்வதாக நினைத்துக்கொண்டு நாம் பயன்படுத்தும் 'இயர்பட்ஸ்' (Earbuds) அல்லது குச்சிகள் உண்மையில் காதுக்கு பெரும் தீங்கையே விளைவிக்கின்றன.

நமது காது தானாகவே அழுக்கை வெளியேற்றும் தன்மையைக் கொண்டது. நாம் பட்ஸைப் பயன்படுத்தும்போது, அழுக்கை வெளியே எடுப்பதற்குப் பதிலாக இன்னும் ஆழமாக செவிப்பறை (Eardrum) நோக்கித் தள்ளுகிறோம். இது காலப்போக்கில் காது கேளாமை, தொற்று பாதிப்பு மற்றும் செவிப்பறையில் ஓட்டை விழுதல் போன்ற தீவிர விளைவுகளை ஏற்படுத்தும். காது அழுக்கு என்பது உண்மையில் கிருமிகள் உள்ளே செல்லாமல் தடுக்கும் ஒரு பாதுகாப்பு அரண். எனவே, காதுக்குள் எதையும் விட்டு குடையாமல் இருப்பதே ஆரோக்கியமானது என்று மருத்துவர்கள் அறிவுறுத்துகின்றனர்.