திருச்சி தொகுதிக்கு யார் வேட்பாளர்?

சென்னை:

திருச்சி லோக்சபா தொகுதிக்கு யாரை வேட்பாளராக நிறுத்துவது என்பது குறித்து வேட்பாளர் தேர்வுக் கமிட்டி அமைத்து முடிவு செய்யப்படும் என பாரதியஜனதா தரப்பில் தெரிவிக்கப்பட்டுள்ளது.

திருச்சி லோக்சபா தொகுதியில், அந்த தொகுதியிலிருந்து தேர்ந்தெடுக்கப்பட்டு சில மாதங்களுக்கு முன் இறந்து போன மத்திய அமைச்சர் ரங்கராஜன்குமாரமங்கலத்தின் தங்கை லலிதா குமாரமங்கலம் போட்டியிடுவார் என கூறப்பட்டு வந்தது.

இந்நிலையில், இது பற்றி தமிழக பாரதிய ஜனதா தரப்பில் கூறப்படுவதாவது:

திருச்சி லோக்சபா தேர்தல் அடுத்த ஆண்டு ஏப்ரல் மாதம் தான் நடைபெற இருக்கிறது. தலைமை தேர்தல் கமிஷன் தேர்தல் அறிவிப்பு வெளியிட்ட பின்தான்வேட்பாளர் யார் என முடிவு செய்யப்படும்.

பாரதிய ஜனதா வேட்பாளரை பொறுத்தவரையில் வேட்பாளர் தேர்வு கமிட்டி வேட்பாளரை தேர்வு செய்யும். அதற்கான கமிட்டியும் தேர்வுசெய்யப்பட்டும். அந்த கமிட்டி வேட்பாளரின் தகுதிகள் பற்றியும் மற்றும் அவர்களை பற்றிய மற்ற விவரங்களையும் தெரிந்து கொண்ட பின்வேட்பாளரை முடிவு செய்யும்.

பாரதிய ஜனதாவின் மாநில செயற்குழு இந்த மாதம் 15 மற்ரும் 16-ம் தேதி ஈரோட்டில் நடக்க இருக்கிறது. தேர்தல் கூட்டணி மேலும் கூட்டணிகட்சிகளிடம் எத்தனை இடங்கள் கேட்பது போன்ற விஷயங்களும் வேட்பாளர் குறித்தும் விவாதிக்கப்படும் என கூறப்பட்டுள்ளது.