கண்ணனுக்கு ஆதரவு கூடுகிறது; கலக்கத்தில் காங்கிரஸ்!

பாண்டிச்சேரி:

காங்கிரஸ் கட்சியிலிருந்து சமீபத்தில் விலகிய ப.கண்ணனுக்கு பல்வேறு தலைவர்கள் மத்தியில் ஆதரவு கூடிவருகிறது. இதனால் ரங்கசாமி தலைமையிலான பாண்டிச்சேரிகாங்கிரஸ் அரசுக்கு ஆபத்து ஏற்படலாம் என்றுகாங்கிரஸ் கட்சி அஞ்சுகிறது.

மக்கள் தலைவர், புரட்சித் தலைவர் என்று பாண்டிச்சேரி மக்களால் அழைக்கப்படும் ப.கண்ணன் சமீபத்தில்காங்கிரஸ் கட்சியிலிருந்து விலகினார். தான் விலகியதற்கான காரணத்தை அவர் தெரிவிக்கவில்லை.

கண்ணனைத் தொடர்ந்து அவரது ஆதரவாளர்களான அமைச்சர்கள் லட்சுமி நாராயணன், ஏழுமலை ஆகியோரும்ராஜினாமா செய்துள்ளனர். மேலும் 2 கண்ணன் ஆதரவு எம்.எல்.ஏக்களும் தாங்கள் வகித்து வரும் வாரியத்தலைவர் மற்றும் அரசுக் கொறடா பதவிகளை உதறுவார்கள் என்று எதிர்பார்க்கப்படுகிறது.

இந் நிலையில் கண்ணனுக்கு பல்வேறு காங்கிரஸ் தலைவர்களும் மறைமுகமாக ஆதரவு தெரிவித்து வருகின்றனர்.பாண்டிச்சேரி நாடாளுமன்றத் தொகுதியின் தற்போதைய எம்.பியான எம்.ஓ.எச்.பாரூக், கண்ணனுக்கு ஆதரவுதெரிவித்துள்ளதாக செய்திகள் வெளியாகின்றன.

கண்ணன் எடுக்கும் முடிவுகளுக்கு தனது ஆதரவு எப்போதும் உண்டு என்று கண்ணனிடம் பாரூக்உறுதியளித்துள்ளதாகத் தெரிகிறது. மேலும், தனது மகன் ஷாஜகானை உடனடியாக அமைச்சராக்க வேண்டும்என்று முதல்வர் ரங்கசாமி மற்றும் காங்கிரஸ் தலைவர் நாராயணசாமி ஆகியோருக்கு கட்டாய கோரிக்கையும்வைத்துள்ளாராம் பாரூக்.

முன்னாள் முதல்வர் வைத்தியலிங்கம் கண்ணனுக்கு ஆதரவாக இருப்பதாக கூறப்படுகிறது. கண்ணனுடன் சேர்ந்துரங்கசாமி அரசைக் கவிழ்க்கவும் அவர் இனி முயற்சி செய்வார் என்று பேச்சு உள்ளது. லஞ்சம் கொடுத்த வழக்கில்சிபிஐயினால் வழக்கு தொடரப்பட்டு சில மாதங்களுக்கு முன்புதான் அவர் விடுவிக்கப்பட்டார். அன்று முதல்மீண்டும் முதல்வர் பதவியைக் கைப்பற்ற வைத்தியலிங்கம் கடுமையாக முயற்சித்து வருகிறார்.

தற்போது கண்ணன் மூலம் ஏற்பட்டுள்ள புதிய சூழ்நிலையைப் பயன்படுத்தி மீண்டும் முதல்வர் பதவியைக்கைப்பற்றி விட வேண்டும் என்று வைத்தியலிங்கம் தீவிரமாக முயற்சிப்பார் என்று கூறப்படுகிறது.

நாடாளுமன்றத் தொகுதியால் ஏற்பட்ட பிரச்சினை, பாண்டிச்சேரி சட்டசபைக்குத் தேர்தல் வர வழி வகுத்துவிடுமோ என்ற சூழ்நிலை தற்போது ஏற்பட்டுள்ளது. இத்தனை குழப்பங்களையும் முதல்வர் ரங்கசாமி எப்படிசமாளிக்கப் போகிறார் என்பதைக் காண பாண்டிச்சேரி மக்கள் ஆவலுடன் காத்துள்ளனர்.