ஆங்கில பெயருடன் வரும் தமிழ் படங்களுக்கு தடா

சென்னை:

தமிழ்த் திரைப்படங்களுக்கு ஆங்கிலப் பெயர்களை சூட்டுவதை எதிர்த்து, அந்தப் படங்கள் ஓடுவதைத் தடுப்போம் என விடுதலைச் சிறுத்தைகள் இயக்கத்தின் பொதுச் செயலாளர் திருமாவளவன் கூறியுள்ளார்.

தமிழ்ப் பாதுகாப்பு இயக்கம் ஒன்றைத் தொடங்கியுள்ள திருமாவளவன், அதன் கூட்டத்தில் அவர் பேசியதாவது:

தமிழ்நாட்டில் தமிழ் மொழியையும் தமிழ் இனத்தையும் கொச்சைப்படுத்தும் வகையில் தொடர்ந்து திட்டமிட்டு, உள்நோக்கத்தோடு, திரைப்படங்களுக்கு தமிழ் அல்லாத பிற மொழிகளில் குறிப்பாக ஆங்கிலத்தில் பெயர் சூட்டி வருகின்றனர்.

இதைத் தவிர்த்திடுமாறு இயக்குனர்கள், தயாரிப்பாளர்கள், நடிகர், நடிகைகளுக்கு தமிழ்ப் பாதுகாப்பு இயக்கத்தின் சார்பில் கடிதங்கள் எழுதினோம். ஆனால், அதை பொருட்டாக மதிக்காமல் பிற மொழிப் பெயர் சூட்டல் தொடர்கிறது.

இதை கண்டிக்கிறோம். இனி இத்தகைய பெயர்களோடு திரைப்படங்கள் வெளியானால், அதை எதிர்த்து போராடி, படம் ஓட்டப்படுவதைத் தடுப்போம்.

மொழி, இன உணர்வுகளை மீட்டெடுக்கவும், தமிழ்த் தேசிய உணர்வை வளர்க்கவும் நாடு தழுவிய அளவில் சுவரெழுத்து இயக்கம் நடத்தப் போகிறோம்.

பள்ளிக் குழந்தைகளுக்கான பாடக் குறிப்பேடுகளில் (நோட்டுகள்) நடிகர், நடிகைகளின் படத்தை அச்சிட்டு விற்று, சினிமா மோகத்தை பிஞ்சு உள்ளங்களில் திட்டமிட்டு வளர்க்கும் போக்கைத் தடுக்க தமிழக அரசு நடவடிக்கை எடுக்க வேண்டும்.

மாறாக வரலாற்றுத் தலைவர்கள், தமிழறிஞர்கள், விஞ்ஞானிகளின் படத்தை அச்சிட்டு விற்க ஆவண செய்ய வேண்டும்.

இவ்வாறு திருமாவளவன் கூறினார்.