தமிழகத்துக்கு ரூ. 2,731 கோடி சேதம்: மத்திய அரசு

டெல்லி:

சுனாமி தாக்குதலால் தமிழகத்துக்கு ரூ. 2,730.70 கோடி அளவுக்கு சேதம் ஏற்பட்டுள்ளதாக மத்திய அரசு கூறியுள்ளது. அந்தமான் தவிர்த்துஇந்தப் பேரலையால் நாட்டுக்கு மொத்தம் ரூ. 5,322.05 கோடி நஷ்டம் ஏற்பட்டுள்ளதாகவும் தெரிவித்துள்ளது.

மத்திய உள்துறை நடத்தியுள்ள ஆரம்ப கட்ட ஆய்வின் அடிப்படையின் இந்த சேதம் மதிப்பிடப்பட்டுள்ளது.

தமிழகத்துக்கு ரூ. 2,730.70 கோடியும், பாண்டிச்சேரிக்கு ரூ. 512 கோடியும், ஆந்திராவுக்கு ரூ. 720.73 கோடியும், கேரளத்துக்கு ரூ.1,358.62 கோடியும் நஷ்டம் ஏற்பட்டுள்ளதாக மத்திய அரசு கணக்கிட்டுள்ளது.

பெரும் சேதம் ஏற்பட்டுள்ள அந்தமான், நிகோபார் தீவுகளில் ஏற்பட்ட பொருட் சேதம் மதிப்பிடப்பட்டு வருகிறது.

தமிழகத்துக்கு ரூ. 4,500 கோடி அளவுக்கு சேதம் ஏற்பட்டுள்ளதாக தமிழக அரசு கூறியுள்ளது குறிப்பிடத்தக்கது.

இதற்கிடையே சேத விவரங்களைப் பார்வையிட மத்திய அரசு அனுப்பிய குழுவினர் தமிழகத்தில் இன்றுடன் தங்களது ஆய்வுகளைமுடித்துக் கொண்டு இன்று டெல்லி திரும்புகின்றனர்.