அதிமுகவுக்கு தேர்தல் ஜூரம்: சொல்கிறார் டாக்டர் ராமதாஸ்

தைலாபுரம் (திண்டிவனம்):

ஆளுங்கட்சிக்கு தேர்தல் ஜூரம் வந்து விட்டதையே தமிழக பட்ஜெட் காட்டுகிறது என்று பாமக நிறுவனர் டாக்டர் ராமதாஸ் கூறியுள்ளார்.

திண்டிவனம் அருகே உள்ள தனது தைலாபுரம் தோட்டத்தில் செய்தியாளர்களிடம் ராமதாஸ் பேசுகையில், வறுமையை ஒழிக்க, வளத்தைப்பெருக்க ஒரு திட்டம் கூட பட்ஜெட்டில் இல்லை.

தமிழக வளர்ச்சிக்கான புதுமையான திட்டங்கள் எதுவும் இடம் பெறவில்லை. மாறாக, கடந்த ஆண்டு அறிவிக்கப்பட்ட திட்டங்களே புதியதிட்டங்கள் போல இந்த பட்ஜெட்டிலும் கூறப்பட்டுள்ளன.

100 பக்க பட்ஜெட்டில், 80 பக்கங்களில் முதல்வரை துதி பாடும் வாசகங்கள்தான் உள்ளன. அதுதான் இந்த பட்ஜெட்டின் ஒரே புரட்சி.

இதை பட்ஜெட் என்று கூற முடியுமா என்று தெரியவில்லை. தேர்தலை கருத்தில் கொண்டு, அந்த ஜூரத்தில் விளைந்ததாகவே இந்த நிதிநிலை அறிக்கை தோன்றுகிறது என்றார் அவர்.