பெண் கற்பழிப்பு: சப்-இன்ஸ்பெக்டருக்கு மரபணு சோதனை

கோவை:

கோவையில் இளம்பெண் கற்பழிக்கப்பட்ட வழக்கில் கைது செய்யப்பட்ட சப் இன்ஸ்பெக்டருக்கு மருத்துவமனையில் ஆண்மை பரிசோதனை நடத்தப்பட்டது.

கோவை காளப்பட்டியை சேர்ந்தவர் சண்முக வேல். இவரது மனைவி மகாலெட்சுமி (வயது 31) கடந்த மே மாதம் ஈரோடு மாவட்ட எஸ்பியிடம் ஒரு புகார் கொடுத்தார். அதில், ஒரு வழக்கு விசாரணைக்காக வெள்ளோடு காவல் நிலையத்திற்கு அழைத்துச் சென்ற சப் இன்ஸ்பெக்டர் தேவராஜ் தன்னை துப்பாக்கி முனையில் கற்பழித்து விட்டதாக கூறியிருந்தார்.

இதன் பேரில் வெள்ளோடு போலீஸார் வழக்குப் பதிவு செய்து தேவராஜை சென்னையில் வைத்து கைது செய்தனர். பின் அவர் பெருந்துறை நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார்.

இந் நிலையில், சப் இன்ஸ்பெக்டர் தேவராஜை ஈரோடு அரசு மருத்துவமனைக்கு போலீஸார் அழைத்து வந்து மரபணு சோதனை நடத்தினர். தொடர்ந்து அவரிடம் போலீஸார் விசாரணை நடத்தி வருகின்றனர்.