ஆபாச நிகழ்ச்சிகள்: எஃப் டிவி.க்கு தடை

டெல்லி:எஃப் டிவியில் நள்ளிரவு 12 மணிக்கு ஒளிபரப்பாகும் மிட்நைட் ஹாட் நிகழ்ச்சி, மிகவும் அநாகரீகமாக இருப்பதாக கூறி அந்த டிவிக்கு மத்திய அரசு தடை விதித்துள்ளது.

இதுகுறித்து மத்திய செய்தி, ஒலிபரப்புத் துறை அமைச்சகம் விடுத்துள்ள செய்திக்குறிப்பில், எஃப் டிவியின் மிட்நைட் ஹாட் நிகழ்ச்சி, அநாகரீகமாகவும், பெண்களை இழிவுபடுத்துவதாகவும், மோசமான ரசனையுடன் கூடியதாகவும் அமைந்துள்ளது.

இதுபோன்ற நிகழ்ச்சிகளால் பொதுமக்களின் மன நிலை பாதிக்கப்படும். எனவே ஏப்ரல் 1ம் தேதி முதல் மே 30ம் தேதி வரை எஃப் டிவியின் அனைத்து நிகழ்ச்சிகளும், கேபிள்டிவி கட்டமைப்பு முறைப்படுத்துதல் சட்டம் 20, உட் பிரிவு 2ன் கீழ் தடை செயய்யப்படுகிறது என்று தெரிவிக்கப்பட்டுள்ளது.

சமீபத்தில் ஏஎக்ஸ்என் டிவியில் ஒளிபரப்பாகும் தி வேர்ல்ட்ஸ் செக்ஸியஸ்ட் அட்வைர்டஸ்மன்ட் நிகழ்ச்சி மிகவும் ஆபாசமாக இருப்பதாக கூறி தடை செய்யப்பட்டது. பின்னர் ஏ.எக்ஸ்.என். டிவி, மத்திய அரசிடம் மன்னிப்பு கோரியதைத் தொடர்ந்து அந்தத் தடை விலக்கிக் கொள்ளப்பட்டது நினைவிருக்கலாம்.