ரூ. 99ல் சென்னை டூ திருச்சிக்குப் பறக்கலாம்!

சென்னை: ஏர் இந்தியா நிறுவனம் கோடை விடுமுறையையொட்டி சென்னை-மும்பை மற்றும் சென்னை-திருச்சி இடையிலான விமான கட்டணங்களை குறைத்துள்ளது. சென்னையிலிருந்து திருச்சி செல்ல ரூ. 99 கட்டணமாக அறிவிக்கப்பட்டுள்ளது.

இதுகுறித்து ஏர் இந்தியா நிறுவனத்தின் பயணசீட்டு விற்பனை மேலாளர் சுப்ரமணியம் வெளியிட்டுள்ள செய்திகுறிப்பில், கோடை கால விடுமுறைக்காக சென்னையிலிருந்து திருச்சிக்கு செல்ல விமானக் கட்டணம் குறைக்கப்பட்டுள்ளது. இதே போல சென்னை-மும்பை விமான கட்டணமும் குறைக்கப்பட்டுள்ளது.

சென்னை-திருச்சிக்கு ரூ.99 கட்டணத்திலும், சென்னை-மும்பைக்கு ரூ.299 கட்டணத்திலும் விமானத்தில் செல்லலாம். வரிகள் தனி.

சென்னையிலிருந்து மும்பைக்கு வியாழக்கிழமை தோறும் பிற்பகல் 2,25க்கு மணிக்கு புறப்படும் விமானத்திலும், வெள்ளி மற்றும் சனிக்கிழமைகளில் பகல் 12.10 மணிக்கு மும்பை செல்லும் விமானங்களிலும் இந்த கட்டண சலுகை வழங்கப்படுகிறது.

இதே போல் திங்கள், புதன் மற்றும் வெள்ளி ஆகிய நாட்களில் சென்னையிலிருந்து காலை 11.40 மணிக்கு திருச்சி செல்லும் விமானத்தில் சலுகை கட்டணம் வசூலிக்கப்படுகிறது.

மேலும் விவரங்கள் அறிய 1412 என்ற தொலைபேசி எண்ணை தொடர்பு கொள்ளலாம் என அதில் குறிப்பிடப்பட்டுள்ளது.