ரேஷன் கடைகளுக்கு இனி ஞாயிறு விடுமுறை

சென்னை:தமிழகத்தில் உள்ள ரேஷன் கடைகளுக்கு ஜூன் 1ம் தேதி முதல் ஞாயிற்றுக்கிழமை விடுமுறை நாளாக இருக்கும் என அரசு அறிவித்துள்ளது.

ரேஷன் கடைகளுக்கு தற்போது வார விடுமுறையாக வெள்ளிக்கிழமை உள்ளது. இதனால் பொதுமக்களுக்கு சிரமம் ஏற்படுவதால், விடுமுறை தினத்தை மாற்றி அமைக்க வேண்டும் என கோரிக்கை விடப்பட்டது.

இதையடுத்து சமீபத்தில் நடந்து முடிந்த சட்டசபை பட்ஜெட் கூட்டத் தொடரில், உணவுத்துறை மானியக் கோரிக்கை மீதான விவாதத்திற்குப் பதிலளித்து உணவுத்துறை அமைச்சர் ஏ.வ.வேலு பேசுகையில், ரேஷன் கடைகளின் வார விடுமுறை தினம் வெள்ளிக்கிழமைக்குப் பதில் ஞாயிற்றுக்கிழமையாக மாற்றப்படும் என அறிவித்திருந்தார்.

அதன்படி ஜூன் 1ம் தேதி முதல் ரேஷன் கடைகளின் வார விடுமுறை தினமாக ஞாயிற்றுக்கிழமை இருக்கும் என தமிழக அரசு இன்று வெளியிட்ட உத்தரவில் தெரிவிக்கப்பட்டுள்ளது.