சன் டிவி பங்குகள் கடும் வீழ்ச்சி

மும்பை:முதல்வர் கருணாநிதி குடும்பத்திலிருந்து தயாநிதி மாறன் தூக்கி எறியப்பட்டு விட்டதால், சன் டிவியின் பங்குகளில் கடும் வீழ்ச்சி ஏற்பட்டுள்ளது.

மதுரை தினகரன் அலுவலகம் மீதான தாக்குதலைத் தொடர்ந்து தயாநிதி மாறனின் அமைச்சர் பதவியை திமுக பறித்தது. மேலும் சன் டிவிக்கும், திமுகவுக்கும் இடையிலான தொடர்பும் முற்றிலும் துண்டிக்கப்பட்டு விட்டது.

இதன் எதிரொலியாக சன் டிவியின் பங்குகள் கடும் விலை வீழ்ச்சியை சந்திக்க ஆரம்பித்துள்ளன. குறிப்பாக திமுக சார்பில் புதிய டிவி தொடங்கப்படவுள்ளாக செய்திகள் வெளியானதைத் தொடர்ந்து சன் டிவியின் பங்கு கடும் வீழ்ச்சியை சந்திக்க ஆரம்பித்துள்ளது.

இன்று ஒரே நாளில் 93 ரூபாய் வரை பங்கு விலை குறைந்துள்ளது. மும்பைப் பங்குச் சந்தையில் இன்று காலை சன் டிவி பங்குகளின் விலை ரூ. 1460 ஆக இருந்தது. பிற்பகல் 12 மணியளவில் இது 93 ரூபாய் குறைந்து ரூ. 1367 ஆக வீழ்ச்சியை சந்தித்தது.

இன்று பெரும் நஷ்டத்தை சந்தித்த நிறுவனங்களில் சன் டிவி முதலிடத்தில் உள்ளது குறிப்பிடத்தக்கது. இன்று மாலைக்குள் சன் டிவியின் பங்கு மதிப்பு மேலும் சரியும் என பங்கு சந்தை வட்டாரத்தில் கூறப்படுகிறது.