மதுரை மேற்கில் காங். வெல்லும்-கிருஷ்ணசாமி

சென்னை:மதுரை மேற்குத் தொகுதியில் காங்கிரஸ் கட்சியின் வெற்றி வாய்ப்பு பிரகாசமாக உள்ளது என்று மாநில காங்கிரஸ் தலைவர் கிருஷ்ணசாமி கூறியுள்ளார்.

சென்னையில் இன்று செய்தியாளர்களிடம் கிருஷ்ணசாமி பேசுகையில்,

ராஜ்யசபா தேர்தலில் காங்கிரஸ் சார்பில் போட்டியிடும் வேட்பாளரின் பெயரையும், மதுரை மேற்குத் தொகுதி காங்கிரஸ் வேட்பாளர் பெயரையும் கட்சி மேலிடம் விரைவில் அறிவிக்கும்.

மதுரைக்கு விரைவில் நானும், சட்டசபை காங்கிரஸ் தலைவர் சுதர்சனமும் செல்லவுள்ளோம். அங்கு கட்சி நிர்வாகிகளுடன் ஆலோசனை நடத்தி வேட்பாளரின் பெயரை கட்சி மேலிடத்துக்குப் பரிந்துரை செய்வோம். பின்னர் வேட்பாளரின் பெயரை கட்சி அறிவிக்கும்.

மதுரை மேற்குத் தொகுதியில் காங்கிரஸ் கட்சியினரும், கூட்டணிக் கட்சியினரும் இப்போதே தேர்தல் பணிகளைத் தொடங்கி விட்டனர். அங்கு காங்கிரஸ் கட்சியின் வெற்றி வாய்ப்பு பிரகாசமாக உள்ளது என்றார் கிருஷ்ணசாமி.