கனடாவில் ஒரு லேடி சின்னி ஜெயந்த்!!

டோரண்டோ:பிற மொழிகள் போர் அடித்ததால், தானே ஒரு புதுமொழியைக் கண்டுபிடித்து பேசி வருகிறார் கனடாவைச் சேர்ந்த 28 வயது இளைஞி.

நாமெல்லாம் போர் அடித்தால் ஏதாவது சினிமா பார்ப்போம், கடை வீதிக்குப் போய் ஒரு ரவுண்டு அடிப்போம், அல்லது சும்மாவாவது அமர்ந்து கொட்டாவி விட்டுக் கொண்டிருப்போம.

ஆனால் டோரண்டோவைச் சேர்ந்த 28 வயது இளம் பெண் சோன்ஜா எலன் கிஸா சற்றே வித்தியாசமானவர்.

உலகில் உள்ள பல்வேறு மொழிகளையும் கற்றுத் தேர்ந்தவர் கிஸா. கல்லூரி மாணவியான கிஸா மொழிபெயர்ப்பாளராகவும் உள்ளார்.

பிரெஞ்சு, ஆங்கிலம், ஜெர்மன் என பல மொழிகளையும் அறிந்த

கிஸாவுக்கு, எந்த மொழியிலும் விசேஷம் இருப்பது போலத் தெரியவில்லை.

பல மொழிகள் படித்தும் கூட எந்த மொழியிலும் தனக்குத் திருப்தி வரவில்லை. எத்தனை நாட்களுக்குத்தான் இந்த மொழிகளையே பேசிக் கொண்டிருப்பது, ஒரே போராக இருக்கிறதே என்று யோசித்துள்ளார்.

இதையடுத்து கடுமையான முயற்சிக்குப் பின் தானே ஒரு புது மொழியை உருவாக்கிவிட்டார்.

இந்த மொழிக்கு டோகி போனா (அதாவது நல்ல மொழி என்று அர்த்தமாம்) என்று அதற்குப் பெயரிட்டார். இதில் 120 வார்த்தைகள் மட்டும்தான் உள்ளன.

இப்போதெல்லாம் இந்த மொழியில்தான் அவர் பேசி வருகிறார். கிஸாவின் மொழியால் ஆர்வமடைந்த மேலும் பலரும் போனால் போகிறது என்று டோகி போனா மொழியை கற்று பேசத் தொடங்கியுள்ளனராம்.

அப்படி இப்படி என்று பரவி இப்போது கிஸாவுடன் சேர்த்து100 பேர் டோகி போனாவை பேசி வருகிறார்களாம்.

மொழியைக் கண்டுபிடித்த கையோடு அந்தப் புது மொழியில் பாடல்கள், கவிதைகள், உரையாடல்களையும் உருவாக்கியுள்ளார் கிஸா. இவரது புதிய மொழி குறித்த விவரங்கள் www.langmaker.com என்ற இணையதளத்தில் வெளியிடப்பட்டுள்ளது. இதைப் பார்த்து பலரும் கிஸாவைத் தொடர்பு கொண்டு புது மொழி குறித்து அறிந்து வருகிறார்களாம்.

அலே லி போனா! (எல்லாம் நல்லதாக முடியட்டும் என்று அர்த்தமாம்)

நம்ம சின்னி ஜெயந்த் கூடத்தான் ஜில்பாங்ஸ் மொழியை ரொம்ப காலத்துக்கு முன்பே உருவாக்கி அவர் மட்டும் பேசிக்கிட்டு இருக்காரு!