நடிகர் விஜயன் மாரடைப்பால் மரணம்
சென்னை:
மூத்த நடிகர் விஜயன் நேற்றிரவு மாரடைப்பால் பலியானார். அவருக்கு வயது 63
கிழக்கே போகும் ரயில் படம் மூலம் திரையுலகில் அறிமுகமானவர் விஜயன். அடுத்து வந்த உதிரிப் பூக்கள் படம் மூலம் ரசிகர்களை கொள்ளை கொண்டார்.
வில்லனாக, ஹீரோவாக மிக அட்டகாசமான நடிப்பைத் தந்தவர் விஜயன். தொடர்ந்து ஒரு விடுகதை ஒரு தொடர்கதை, பசி, பாலைவன ரோஜாக்கள் உள்பட பல படங்களில் நடித்தார்.
அதன் பின்னர் காணாமல் போனார். குடிப்பழக்கத்தால் பாதிக்கப்பட்டு வறுமையில் வாடினார்.
அவருக்கு ரன் படம் மறுவாழ்வு தந்தது. தொடர்ந்து தமிழ்ப் படங்களில் தலைகாட்ட ஆரம்பித்தார். சமீபத்தில் அஜீத்துடன் வரலாறு படத்திலும் நடித்தார்.
ஆனால், உடல் நலம் பாதிக்கப்பட்டதால் தனது சொந்த ஊரான கோழிக்கோடு சென்று விட்டார். விஜயனும் அவரது மனைவியும் 10 வருடங்களுக்கு பிரிந்துவிட்டனர். இவரது மகளுக்கு கடந்த வருடம் திருமணம் நடந்தது.
இந் நிலையில் சுந்தர் சி நடிக்கும் ஆயுதம் செய்வோம் படத்தில் நடிக்க கடந்த வாரம் சென்னை வந்தார்.
இந் நிலையில் நேற்றிரவு அவருக்கு மாரடைப்பு ஏற்பட்டது. வாந்தி எடுத்தார். இதையடுத்து வடபழனியில் சூர்யா மருத்துவமனையில் சேர்க்கப்பட்டார். ஆனால், சிகிச்சை பலனின்றி இறந்துவிட்டார்.