தமிழக போக்குவரத்து ஊழியர்களுக்கு 20% தீபாவளி போனஸ்

சென்னை:

தமிழக போக்குவரத்துக் கழக ஊழியர்களுக்கு இந்த வருடம் 20 சதவீத போனஸ் வழங்கப்படுவதாக தமிழக அரசு அறிவித்துள்ளது. இதன் மூலம் 1.12 லட்சம் போக்குவரத்து ஊழியர்கள் பலனடைவர்.

இதுகுறித்து தமிழக அரசு வெளியிட்டுள்ள அறிக்கையில்,

முதல்வர் கருணாநிதி 5வது முறையாக பொறுப்பேற்றுக் கொண்டதும், போக்குவரத்துக் கழக ஊழியர்களுக்கு 2005-06ம் ஆணடிற்கான போனஸ் 8.33 சதவீதம், கருணைத் தொகை 11.67 சதவீதம் என மொத்தம் 20 சதவீதம் போனஸ் வழங்கப்பட்டது. இதன்படி 1.12 லட்சம் ஊழியர்களுக்கு மொத்தம் ரூ.63.14 கோடி வழங்கப்பட்டது. ஒரு நபருக்கு சராசரியாக ரூ. 5,639 வழங்கப்பட்டது.

இந்த வருடம் போனஸ் சட்ட விதிமுறைகள் மாற்றி அமைக்க உத்தேசிக்கப்பட்டுள்ளது. இதன்படி போனஸ் கணக்கீட்டுக்கான உயர்ந்தபட்ச மாத ஊதியம் ரூ. 2,500லிருந்து ரூ. 3,500 ஆகவும்,

போனஸ் பெற தகுதியான ஊதிய வரம்பு ரூ. 3,500லிருந்து ரூ. 10,000 ஆகவும் திருத்தி அமைக்கப்பட உள்ளது.

இதன் மூலம் இந்த ஆண்டு ஒரு ஊழியருக்கு சராசரியாக ரூ. 7,791 போனஸாக கிடைக்கும். இதனால் அரசுக்கு ரூ. 86 கோடி கூடுதல் செயலாகும். இதனால் 1.12 லட்சம் ஊழியர்கள் பலனடைவர் என்று கூறப்பட்டுள்ளது.