குருஜி டாட் காமில் சாண்ட்ஸ்டோன் 10 மில்லியன் முதலீடு

முன்னணி இந்திய சர்ச் என்ஜினான குருஜி டாட் காம் நிறுவனத்திற்கு அமெரிக்காவின் பாஸ்டன் நகரைச் சேர்ந்த வென்சர் காபிடல் நிறுவனமான சாண்ட்ஸ்டோன் 10 மில்லியன் டாலர் நிதியுதவி வழங்கவுள்ளதாகத் தெரிகிறது.

ஆனால், இந்தத் தகவலை குருஜி டாட் காம் இதுவரை உறுதிப்படுத்தவில்லை. ஸீகுயோயா கேபிடல் நிறுவனத்தின் முதல் கட்ட நிதியுதவியோடு குருஜி டாட் காமை உருவாக்கினார் பாஸ் டாட் காம் நிறுவனத்தை உருவாக்கிய சுவிர் சுஜன். சுஜனும் சிறிது நிதியை இதில் முதலீடு செய்தார். கடந்த டிசம்பரில் குருஜியில் மேலும் 7 மில்லியன் டாலர் அளவுக்கு முதலீடு செய்யப்போவதாக ஸீகுயோயா அறிவித்தது. ஆனால், எவ்வளவு நிதியை வழங்கியது என்று தெரியவில்லை.

இந் நிலையில் தான் சாண்ட்ஸ்டோன் முதலீடு செய்ய முன் வந்துள்ளது. இந்திய நிறுவனங்களில் முதலீடு செய்வதில் முனனணியில் உள்ள அமைப்பு சாண்ட்ஸ்டோன் கேபிடன் என்பது குறிப்பிடத்தக்கது. கடந்த ஆண்டு ஆப்டிகல் நெட்வோர்க்கிங் நிறுவனமான தேஜஸ் நெட்வோர்க்ஸ் நிறுவனத்திற்கு 20 மில்லியனை சாண்ட்ஸ்டோன் வழங்கியது.