எய்ம்ஸ் சட்ட திருத்தம்-அவையை புறக்கணித்த பாஜக
டெல்லி: அகில இந்திய மருத்துவ ஆய்வுக் கழகத்தின் (AIIMS) சட்ட திட்டங்களை மாற்றி மத்திய அரசு கொண்டு வந்த சட்டத் திருத்தத்தை பாஜக கடுமையாக எதிர்த்து மாநிலங்களவையில் இருந்து வெளிநடப்பு செய்தது.
டாக்டர்கள் ஓய்வு பெறும் வயது தொடர்பாகவும், எய்ம்ஸ் நிர்வாகத்தை மாற்றியமைப்பது தொடர்பாகவும் மத்திய அரசு புதிய விதிகளை கொண்டு வந்துள்ளது. இது தொடர்பாக சட்ட மசோதா நாடாளுமன்றத்தில் நிறைவேற்றப்பட்டது.
எய்ம்ஸ் தலைவரான வேணுகோபாலின் பதவியைப் பறிக்க இந்த சட்டத் திருத்தம் வகை செய்யும். இட ஒதுக்கீட்டுக்கு எதிராக மருத்துவ மாணவர்களை வேணுகோபால் தூண்டிவிட்டதாக புகார் உள்ளது நினைவுகூறத்தக்கது. இதையடுத்து மத்திய நலத்துறை அமைச்சர் அன்புமணிக்கும் வேணுகோபாலுக்கும் மோதல் மூண்டது.
இந் நிலையில் எய்ம்ஸ் தலைவரின் பதவிக்கான வயது வரம்பை 65 ஆகக் குறைத்து சட்டத் திருத்தத்தை மத்திய அரசு கொண்டு வந்தது. இந்த சட்டத்தின் மூலம் வேணுகோபாலின் பதவி பறிக்கப்படும்.
ஆனால், இந்த சட்டத்தை நிறைவேற்றுவதை கண்டித்து நேற்று முழுவதும் பாஜக ராஜ்யசபா எம்பிக்கள் அவையைப் புறக்கணித்தனர்.