அமிதாப்பச்சனின் தாயார் தேஜி பச்சன் மரணம்

மும்பை: சூப்பர் ஸ்டார் அமிதாப் பச்சனின் தாயார் தேஜி பச்சன் மும்பையில் இன்று காலமானார். அவருக்கு வயது 93.

நீண்ட காலமாக உடல் நலம் பாதிக்கப்பட்டிருந்த தேஜி பச்சன், மும்பை லீலாவதி மருத்துவமனையில் அனுமதிக்கப்பட்டிருந்தார். கடந்த மாதம் அவர் அவசர சிகிச்சைப் பிரிவுக்கு மாற்றப்பட்டார். இந்த நிலையில் இன்று காலை அவரது உடல் நிலை மோசமடைந்தது. இதைத் தொடர்ந்து அவரது உயிர் பிரிந்தது.

தேஜி பச்சனின் கணவரும், பிரபல இந்திக் கவிஞருமான ஹரிவன்ஷ் ராய் பச்சன் ஏற்கனவே இறந்து விட்டார்.

அமிதாப்பின் மகன் அபிஷேக் பச்சனுக்கும், ஐஸ்வர்யா ராய்க்கும் கல்யாணம் நடந்தபோது தேஜி பச்சன் மருத்துவமனையில் அனுமதிக்கப்பட்டிருந்தார். இதன் காரணமாகவே கல்யாணத்தை மிக பிரமாண்டமாக நடத்தாமல் வீட்டிலேயே வைத்து நடத்தினர் என்பது குறிப்பிடத்தக்கது.