காபி.. சர்க்கரை நோயாளிகளின் எதிரி!

வாஷிங்டன: காபி, டீ, சாப்ட் டிரிங்குகளைக் குறைத்தால் சர்க்கரை நோயை கட்டுப்படுத்தலாம் என்று ஆய்வில் தெரியவந்துள்ளது.

டைப் 2 வகை நீரிழிவு நோய்க்கு முக்கிய காரணமாக காபின் (Caffeine) விளங்குவதாகவும், இது காபி தவிர டீ, சாப்ட் டிரிங்குகளிலும் அதிகம் உள்ளதாகவும் டியூக் பல்கலைக்கழக மருத்துவ ஆய்வுக் கழகம் தெரிவித்துள்ளது.

இந்த கழத்தின் ஆய்வாளர் டாக்டர் ஜேம்ஸ் லேன் கூறுகையில், டைப் 2 ரக சர்க்கரை நோய் உள்ளவர்களுக்கு இன்சுலின் சிகிச்சை மட்டும் போதாது. உணவிலும் தீவிர கட்டுப்பாடு தேவை. இன்சுலின் சிகிச்சையுடன் காபின் நிறைந்த பானங்கள் குடிப்பதை தவிர்க்கும்போது ரத்தத்தில் சர்க்கரையின் அளவை கட்டுப்படுத்துவது எளிதாகிறது.

காபின் நிறைந்த பானங்களை பருகுவோருக்கு ரத்தத்தில் சர்க்கரையின் அளவு 8 முதல் 26 சதவீதம் அளவுக்கு அதிகமாவது ஆய்வில் உறுதியாகியுள்ளது.

இதனால் சர்க்கரை நோயாளிகள் காபி குடிப்பதையும் காபின் கொண்ட பானங்களை அருந்துவதையும் தவிர்த்துவிடுவதே நல்லது என்கிறார்.

இத் தகவலை சயின்ஸ் டெய்லி இதழ் தெரிவித்துள்ளது.