விண்ணைத் தொடும் தங்கம் விலை-அதிர்ச்சியில் நடுத்தர மக்கள்

சென்னை: தங்கம் விலை கடந்த சில நாட்களாக வரலாறு காணாத வகையில் உயர்ந்து வருவதால் சுப காரியங்களுக்கு தங்கம் வாங்கச் செல்லும் மக்கள் விழி பிதுங்கியுள்ளனர்.

கடந்த 2007ம் ஆண்டு துவக்கத்தில் தங்கம் விலை பவுனுக்கு ரூ.6,816 ஆக இருந்தது. பின்னர் படிப்படியாக உயர்ந்து புத்தாண்டு பிறக்கப் போவதை முன்னிட்டு டிசம்பர் மாத இறுதியில் ரூ.8,000த்தைத் தாண்டியது.

புத்தாண்டை முன்னிட்டு அதிகம் பேர் புதிய நகைகள் வாங்குவார்கள் என்பதால் இந்த விலை உயர்வு இருக்கும். ஜனவரியில் விலை குறைந்து விடும் என அனைத்து தர மக்களும் எதிர்பார்த்தனர். ஆனால், முழுவதும் விலை குறையவில்லை.

சில தினங்களுக்கு பங்குச் சந்தை கடும் சரிவை சந்தித்த போது தங்கத்தின் விலை வெகுவாக குறையும் என அனைவரும் எதிர்பார்த்தனர். ஆனால் தங்கம் விலையில் சிறிதளவே மாற்றம் இருந்தது.

ஆனால் தற்போது யாருமே எதிர்பாராத வண்ணம் தற்போது ஒரு பவுன் தங்கத்தின் விலை ரூ.8,728 ஆக அதிகரித்துள்ளது. 1 கிராம் தங்கத்தின் விலை ரூ.1,091 ஆக உள்ளது. 1 பவுன் எடையுள்ள நகை வாங்கினால் செய்கூலி, சேதாரம் அனைத்தும் சேர்த்து ரூ.10,000த்தை தாண்டி விடுகிறது.

மக்கள் அதிர்ச்சி:

தை பிறந்துவிட்டதால் தொடர்ந்து ஏராளமான முகூர்த்த நாட்கள் வருகின்றன. இதனால் திருமணம் உள்ளிட்ட நல்ல காரியங்களுக்கு நகைகள் வாங்கச் செல்பவர்களை இந்த விலை உயர்வு பெரும் அதிர்ச்சியில் ஆழ்த்தி வருகிறது.