ராஜ் தாக்கரேக்கு சவால் விட்ட அமர் சிங்குக்கு கொலை மிரட்டல்

மும்பை: மராட்டிய நவ நிர்மான் சேனாவின் தலைவர் ராஜ் தாக்கரேக்கு சவால் விட்ட சமாஜ்வாடி கட்சி பொதுச் செயலாளர் அமர்சிங்குக்கு கொலை மிரட்டல் விடுக்கப்பட்டுள்ளது.

சில தினங்களுக்கு முன் ராஜ் தாக்கரே, பாலிவுட் நடிகர் அமிதாப் பச்சனை தாக்கி பேசியிருந்தார். இதற்கு அமிதாப்பின் மனைவி ஜெயா பச்சன், ராஜ் தாக்கரேயை எதிர்த்து பதில் அளித்திருந்தார்.

இதனால் ராஜ் தாக்கரேயின் ஆதரவாளர்கள் மும்பையில் வன்முறையில் இறங்கினர். அங்கிருந்த உ.பி, பீகார் ஆகிய நிலத்தவர்கள் மீது தாக்குதல் நடத்தப்பட்டது. இதற்கு நாடு முழுவதும் கடும் எதிர்ப்பு கிளம்பியுள்ளது.

இதனால் போலீசார் ராஜ் தாக்கரே மீது வழக்குப் பதிவு செய்துள்ளனர். இந்நிலையில் ராஜ்தாக்கரே எந்நேரமும் கைது செய்யப்படலாம் எனத் தெரிகிறது.

இதற்கிடையில் சமாஜ்வாடி கட்சி பொதுச் செயலாளர் அமர்சிங் தனது அனுமதி இல்லாமல் மும்பைக்குள் நுழைய முடியாது என ராஜ் தாக்கரே மிரட்டல் விடுத்திருந்தார்.

இதுகுறித்து அமர்சிங் மகராஷ்டிர உள்துறை அமைச்சர் ஆர்.ஆர்.பாட்டீலிடம் புகார் செய்தார். அதற்கு அவர், அமர்சிங் மும்பை வரும்போது தக்க பாதுகாப்பு அளிக்கப்படும் என உறுதியளித்தார்.

இந் நிலையில் மும்பை வந்த அமர்சிங் செய்தியாளர்களிடம் கூறியதாவது,

எனது செல்போனுக்கு கொலை மிரட்டல் விடுத்து தொடர்ந்து எஸ்.எம்.எஸ். வருகிறது. இந்த மிரட்டல் விடுத்தவர்கள் பற்றி போலீஸ் நடவடிக்கை எடுக்க வேண்டும். இல்லையென்றால் மும்பை காவல்துறை ஆணையரை எதிர்த்து கெரோ செய்வேன்.

மும்பை போலீஸ் கமிஷ்னர் தனது மகள் திருமண வரவேற்பு நிகழ்ச்சியில் பங்கேற்க ராஜ் தாக்கரேயை நேரில் சந்தித்து அழைப்பு விடுத்துள்ளார். போலீஸ் கமிஷ்னரும், துணை கமிஷ்னரும் ராஜ் தாக்கரேக்கு சல்யூட் அடிக்கிறார்கள்.

சமாஜ்வாடி கட்சி மராட்டியர்களுக்கு எதிரானது அல்ல. சத் பூஜா உட்பட மராட்டியர்களின் பல்வேறு விழாக்களையும் எங்கள் கட்சி கொண்டாடுகிறது. மும்பையில் தாக்கப்பட்ட சமாஜ்வாடி கட்சி தொண்டர்களுக்கு மொத்தம் ரூ. 20 லட்சம் இழப்பீடு வழங்கப்படும்.

மும்பையில் நடிகர் அமிதாப் பச்சன் வீடு தாக்கப்பட்டது தொடர்பாக அவர் போலீசில் புகார் செய்ய விரும்பவில்லை. அதற்கு அவர் முக்கியத்துவமும் அளிக்கவில்லை. எனக்கு பாதுகாப்பு அளிக்க உத்தரவிட்ட மகாராஷ்டிர உள்துறை அமைச்சருக்கு நன்றி.

அதே நேரத்தில் மாநில அரசு வட மாநிலத்தவர்களுக்கு எதிராக கருத்து தெரிவித்த ராஜ் தாக்கரேயை பாதுகாக்கிறது என்றார் அமர்சிங்.