அரசு டைரக்டரியில் பின் தள்ளப்பட்ட சன் டிவி!

மதுரை: தமிழக அரசின் டெலிபோன் டைரக்டரியில் ஒரு காலத்தில் முதலிடத்தில் இருந்த சன் டிவி இப்போது பின்னுக்குத் தள்ளப்பட்டுள்ளது.

தமிழகத்தில் எந்தக் கட்சி ஆட்சியில் இருக்கிறதோ, அந்தக் கட்சிக்கு ஆதரவான இதழ்கள், டிவி சானல்களின் பெயர்கள்தான் அரசின் செய்தித்துறை வெளியிடும் தொலைபேசி டைரக்டரியில் முன்னணியில் இடம் பெற்றிருக்கும்.

திமுக ஆட்சிக்கு வரும்போதெல்லாம் சன் டிவிக்குத்தான் முதலிடம் கிடைக்கும். அதேபோல தினகரனுக்கும் முதலிடம் கொடுக்கப்பட்டது.

அதேபோல அதிமுக ஆட்சிக்கு வந்தால் ஜெயா டிவிக்கு முதலிடம் கிடைக்கும். சன் டிவியின் பெயர் கடைசிக்கு தள்ளப்பட்டு விடும்.

இந் நிலையில் தற்போதைய திமுக ஆட்சியின் தொடக்கத்தில் சன் டிவியின் பெயர் முதலிடத்தில் இருந்தது. ஆனால் இப்போது நிலைமை மாறி விட்டது.

இந்த ஆண்டு அரசு வெளியிட்டுள்ள புதிய டெலிபோன் டைரக்டரியில், கலைஞர் டிவிக்கு முதலிடம் கிடைத்துள்ளது. 2வது இடம் சன் டிவிக்குக் கிடைத்துள்ளது. ஜெயா டிவி பின்னுக்குப் போயுள்ளது.