காதல் 'ஸ்பின்'னில் சிக்கிய பதான்!

பரோடா: இந்திய வேகப் பந்து வீச்சாளர் இர்பான் பதான் காதல் வலையில் சிக்கியுள்ளாராம். காதலியுடன் ஆஸ்திரேலியாவில் இன்பச் சுற்றுலாவில் அவர் ஈடுபட்டிருப்பதாகவும் கூறப்படுகிறது.

வேகமா இர்பானை, தனது காதல் ஸ்பின்னால் வீழ்த்திய அந்த அழகுப் பெண் ஷிவாங்கி தேவ். கடந்த ஆண்டு ரஞ்சி டிராபி போட்டியின்போதுதான் இர்பானுக்கும், ஷிவாங்கிக்கும் இடையே காதல் இன்னிங்ஸ் தொடங்கியதாம்.

அப்போது பரோடா அணிக்கும், உ.பி. அணிக்கும் இடையே நடந்த போட்டியின்போது பதான் 81 ரன்களை விளாசினார். அப்போது போட்டியைப் பார்த்துக் கொண்டிருந்த ஷிவாங்கி, பவுன்டரி லைன் வரை வந்து கை தட்டி, உற்சாகமாக பதானைப் பாராட்டினார். அங்குதான் விழுந்து விட்டாராம் பதான்.

தொடர்ந்து இருவரும் அறிமுகமாகி, நட்பை வளர்த்து இப்போது காதலில் முடித்துள்ளனராம். டெஸ்ட் போட்டி போல ஆரம்பித்த இந்த காதல் இப்போது 20-20 வேகத்தில் போய்க் கொண்டிருக்கிறதாம்.

ஷிவாங்கி இப்போது இருப்பது ஆஸ்திரேலியாவில். தலைநகர் கான்பெராவில் உள்ள இந்தியத் தூதரகத்தில் அதிகாரியாக இருக்கிறாராம் ஷிவாங்கியின் அப்பா.

இந்திய அணியின் ஆஸ்திரேலிய பயணம் முடிந்து அனைவரும் நாடு திரும்பிய நிலையில், இர்பான் தனது காதல் தொடரை தொடங்கியுள்ளாராம். ஆஸ்திரேலியாவிலேயே தொடர்ந்து முகாமிட்டு ஷிவாங்கியுடன் காதல் உலா போய்க் கொண்டிருக்கிறாராம்.

இதெல்லாம் உண்மையா என்று பதான்தரப்பில் கேட்டால், அவர்கள் மறுக்கிறார்கள். பதானின் உறவினர் ஒருவர் ஆஸ்திரேலியாவில் உடல் நலம் சரியில்லாமல் இருக்கிறாராம். அவரைப் பார்க்கத்தான் பதான் ஆஸ்திரேலியாவில் தங்கியிருப்பதாக அவர்கள் கூறுகின்றனர்.

மெய்யாலுமா, பதான்?