கத்தாரில் முதல் கத்தோலிக்க தேவாலயம் திறப்பு

தோஹா: கத்தார் தலைநகர் தோஹாவில் முதல் கத்தோலிக்க தேவாலயம் திறக்கப்பட்டது.

கத்தார் நாட்டுத் தலைநகர் தோஹாவில் சுமார் 63 நாடுகளைச் சேர்ந்த ஒரு இலட்சத்திற்கும் மேற்பட்ட கத்தோலிக்க கிறிஸ்தவர்கள் பணிபுரிந்து வருகின்றனர். அவர்களின் கோரிக்கையின்படி தேவாலயம் திறக்க போப் பெனிடிக்ட் அனுமதியளித்தார்.

இதையடுத்து தோஹாவில் கடந்த 15ம் தேதி, முதல் கத்தோலிக்க தேவாலயம் திறக்கப்பட்டது.

இந்த விழாவில் பத்தாயிரத்துக்கும் மேற்பட்ட கிறிஸ்தவர்கள் கலந்துக் கொண்டனர். சிறப்பு வழிபாடுகளும் நடந்தன. தேவாலயம் அமைக்க அனுமதி வழங்கியதற்காக கத்தார் அமீர் ஷேக் ஹமத் பின் கலிஃபா அல்தானிக்கு போப் பெனிடிக்ட் வாழ்த்துக்களைத் தெரிவித்தார்.

தேவாலயத்தைப் பார்வையிட்ட கத்தார் துணைப்பிரதமர் அப்துல்லாஹ் அல் அதிய்யாஹ், கத்தார் நாட்டிற்கு வருகை தர போப்பிற்கு அழைப்பு விடுத்துள்ளார்.