சேப்பாக்கத்தில் விஜய்யுடன் கமல்: ரசிகர்கள் உற்சாகம்

சென்னை: சேப்பாக்கத்தில் நேற்று நடந்த சென்னை சூப்பர்கிங்ஸ் மற்றும் கொல்கத்தா நைட் ரைடர்ஸ் அணிகளுக்கு இடையிலான பரபரப்பான ஆட்டத்தில் திடீர் விருந்தாளியாக நடிகர் கமல்ஹாசன் வந்திருந்ததால் ரசிகர்கள் குஷியடைந்தனர்.

2 அணிகளில் ஹாட்ரிக் வெற்றியை யார் குவிப்பார்கள் என்ற நிலையில் நடந்த நேற்றைய ஆட்டத்தின்போது கொளுத்தும் வெயிலையும் பொருட்படுத்தாத ரசிகர் வெள்ளத்தால் மைதானம் நிரம்பி வழிந்தது.
சென்னை கிங்ஸ் வீரர்கள் பெவிலியனில் அதன் பிராண்ட் அம்பாசிடர் நடிகர் விஜய் தன் மகனுடன் வந்து வீரர்களையும், ரசிகர்களையும் உற்சாகப்படுத்தினார்.

அப்போது திடீர் என்று பெவிலியன் பகுதிக்குள் நடிகர் கமல்ஹாசன் தோன்றினார். இதை தொலைக்காட்சியில் பார்த்த ரசிகர்களின் உற்சாக கரகோஷத்தில் மைதானம் அதிர்ந்தது.

அதற்கு முந்தையநாளில்தான் ஹாலிவுட் நடிகர் ஜாக்கிசானை வைத்து தசாவதாரம் ஆடியோவை வெளியிட்டு சென்னையை அதிரவைத்திருந்தார் கமல்ஹாசன். உலகில் வேறு எந்த நடிகரும் நடித்திராத வகையில் இந்த படத்தில் 10 வேடங்களில் கமல் நடிப்பது குறிப்பிடத்தக்கது.

வழக்கம்போல் டிரம்மர் சிவமணி தனது அதிரடி இசையால் ரசிகர்களின் உற்சாகத்துக்கு கூடுதல் ரிதம் சேர்த்தார்.

ஆட்டம் துவங்குவதற்கு முன்பு 2 மணிநேரமாக பெவிலியனில் ஆட்டம் பாட்டம் தூள் பறந்தது. போலீஸ் எச்சரிக்கையடுத்து வெளிநாட்டு நடன மங்கைகளின் ஆட்டத்தில் கவர்ச்சி கொஞ்சம் அடக்கியே வாசிக்கப்பட்டது.