கரோலினாவில் ஒபாமா வெற்றி - ஹில்லாரிக்கு இன்டியானா

வாஷிங்டன்: வடக்கு கரோலினா மாகாணத்தில் நடந்த வாக்கெடுப்பில் பாரக் ஒபாமா வெற்றி பெற்றார். இன்டியானா மாகாணத்தில் ஹில்லாரி கிளிண்டன் வெற்றி பெற்றார்.

அமெரிக்க அதிபர் தேர்தலில் ஜனநாயகக் கட்சி சார்பில் போட்டியிடும் வேட்பாளரைத் தேர்வு செய்வதில் பெரும் இழுபறி நீடிக்கிறது. பாரக் ஒபாமா வாக்குகள் அடிப்படையில் முன்னணியில் உள்ளார். அடுத்த இடத்தில் ஹில்லாரி இருக்கிறார். சில நாட்களுக்கு முன்பு குவாம் தீவில் நடந்த வாக்கெடுப்பில் ஒபாமா வெற்றி பெற்றார்.

இந்த நிலையில் வடக்கு கரோலினா மற்றும் இன்டியானா மாகாணங்களில் நடந்த வாக்கெடுப்பில் இருவருக்கும் தலா ஒரு வெற்றி கிடைத்துள்ளது. வடக்கு கரோலினா மாகாணத்தில் ஒபாமா வெற்றி பெற்றுள்ளார். ஆனால் இன்டியானாவை ஹில்லாரி வென்றுள்ளார்.

வடக்கு கரோலினா மாகாணத்தில் வென்றதன் மூலம் ஒபாமாவுக்கு வாக்குகள் கூடியுள்ளது.

வடக்கு கரோலினாவில் ஒபாமாவுக்கு 56 சதவீத வாக்குகளும், ஹில்லாரிக்கு 42 சதவீத வாக்குகளும் கிடைத்தன. இன்டியானாவில் ஹில்லாரிக்கு 51 சதவீத வாக்குகளும், ஒபாமாவுக்கு 49 சதவீத வாக்குகளும் கிடைத்தன.

மொத்தமாக தற்போது ஒபாமாவுக்கு 1803 வாக்குகள் உள்ளன. ஹில்லாரிக்கோ 1653 வாக்குகளே உள்ளன. 2025 வாக்குகள் பெறுபவரே வேட்பாளராக தேர்வு பெற முடியும். இன்னும் 6 மாகாணங்களில் வாக்கெடுப்பு நடைபெற வேண்டியுள்ளது.