விலகினார் ஹில்லாரி-ஓபாமாவுக்கு ஆதரவு

வாஷிங்டன்: அமெரிக்க அதிபர் தேர்தல் வேட்பாளருக்கான போட்டியிலிருந்து முறைப்படி விலகுவதாக அறிவித்துள்ளார் ஹில்லாரி கிளிண்டன். மேலும், ஓபாமாவின் வெற்றிக்கு முழுமையாக பாடுபடப் போவதாகவும் அவர் அறிவித்துள்ளார்.

வாஷிங்டனில் இதுகுறித்து செய்தியாளர்களிடம் ஹில்லாரி பேசுகையில், எனது பிரசாரத்தை இன்றுடன் நிறுத்திக் கொள்கிறேன். ஓபாமா போட்டியில் வெற்றி பெற்றுள்ளார். அவருக்கு நான் வாழ்த்துக்களைத் தெரிவித்துக் கொள்கிறேன். தேர்தலிலும் அவர் வெற்றி பெற வாழ்த்துகிறேன்.

அவரை நான் ஆதரிக்கிறேன். எனது முழு ஆதரவையும் அவருக்குத் தெரிவிக்கிறேன். அவரது வெற்றிக்குப் பாடுபடுவேன். நாம் அனைவரும் ஓபாமாவின் வெற்றியை உறுதி செய்ய வேண்டும்.

நமது முழு சக்தி, லட்சியம், பலத்தை பாரக் ஓபாமாவுக்காக செலவிட வேண்டும். அவரை அமெரிக்காவின் அடுத்த அதிபராக்க வேண்டும் என்றார் ஹில்லாரி.