பாகிஸ்தான்: ஜனாதிபதி பதவிக்கு சர்தாரி?

இஸ்லாமாபாத்: பாகிஸ்தான் அதிபர் பதவிக்கு பாகிஸ்தான் மக்கள் கட்சியின் இணைத் தலைவர் ஆசிப் அலி சர்தாரியை நிறுத்த அக்கட்சி முடிவெடுத்துள்ளதாக தெரிகிறது. நாளை சர்தாரியின் பெயரை அதிகாரப்பூர்வமாக அக்கட்சி அறிவிக்கும் எனத் தெரிகிறது.

பாகிஸ்தான் அதிபராக இருந்து வந்த முஷாரப்பை கடும் நெருக்கடி கொடுத்து அப்பதவியிலிருந்து அனுப்பி விட்ட பாகிஸ்தான் மக்கள் கட்சி, நவாஸ் ஷெரீப்பின் முஸ்லீம் கட்சி தலைமையிலான ஆளுங்கூட்டணி அடுத்த அதிபரைத் தேர்வு செய்வதில் தற்போது மும்முரமாகியுள்ளன.

பாகிஸ்தான் மக்கள் கட்சியின் இணை தலைவரும், மறைந்த பெனாசிர் பூட்டோவின் கணவருமான ஆசிப் அலி சர்தாரியை அதிபர் பதவிக்கு தேர்வு செய்ய அக்கட்சி தீர்மானித்துள்ளது. இந்த முடிவுக்கு கட்சியின் எம்.பிக்கள் ஒருமித்த ஆதரவை தெரிவித்துள்ளனர். இதுதொடர்பான முடிவு நேற்று இரவு நடந்த எம்.பிக்கள் மற்றும் கட்சித் தலைவர்கள் கூட்டத்தில் எடுக்கப்பட்டது.

நேற்று தான், சர்தாரி அதிபராக முட்டாஹிதா குவாமி இயக்கம் ஆதரவு அளித்திருந்தது என்பது குறிப்பிடத்தக்கது.

சில தினங்களுக்கு முன்பு சர்தாரி அளித்த பேட்டியில், நான் அதிபர் பதவிக்கு ஆசைப்படவில்லை. ஆனால் கட்சி என்ன முடிவு எடுக்கிறதோ அதற்கு நான் கட்டுப்பட வேண்டும். யாரை வேண்டுமானாலும் வேட்பாளராக தேர்வு செய்ய கட்சிக்கு உரிமை உண்டு என்று கூறியிருந்தார்.

நேற்று இரவு நடந்த கட்சிக் கூட்டத்தில் அவர் பேசுகையில், அதிபர் தேர்தல் வேட்பாளர் தொடர்பாக கூட்டணிக் கட்சிகளுடன் பேசிய பிறகு இறுதி முடிவு எடுக்கப்படும் என்று கூறினார்.

அதேசமயம், அடுத்த அதிபராக பலுசிஸ்தான், வட மேற்கு எல்லைப்புற மாகாணம் போன்ற சிறிய மாகாணத்தைச் சேர்ந்தவராக இருக்க வேண்டும் என நவாஸ் ஷெரீப்பின் முஸ்லீம் லீக் கட்சி தெரிவித்துள்ளது. சர்தாரி அதிபராக அக்கட்சிக்கு உடன்பாடு இல்லை என்பதையே இது உணர்த்துவதாக உள்ளது.