குடியரசுக் கட்சி துணை அதிபராக சாரா பலின் அறிவிப்பு

வாஷிங்டன்: குடியரசுக் கட்சியின் சார்பில் துணை அதிபர் வேட்பாளராக அலாஸ்கா மாகாண ஆளுநரான சாரா பாலின் தேர்வு செய்யப்பட்டுள்ளார்.

ஜனநாயகக் கட்சியின் சார்பில் அதிபர் தேர்தலுக்குப் போட்டியிடும் பாரக் ஓபாமா, துணை அதிபர் பதவிக்கு வேட்பாளராக ஜோசப் பிடனை சமீபத்தில் அறிவித்தார். இந்தநிலையில் குடியரசுக் கட்சியின் துணை அதிபர் வேட்பாளர் பெயர் அறிவிக்கப்பட்டுள்ளது.

இந்திய வம்சாவளியைச் சேர்ந்த ஆளுநர் பாபி ஜிண்டால் வேட்பாளராக அறிவிக்கப்படுவார் என எதிர்பார்க்கப்பட்டு வந்தது. ஆனால் யாரும் எதிர்பாராத வகையில், அதிகம் அறியப்படாதவரான, அலாஸ்கா மாகாண ஆளுநரான சாரா பாலின் அறிவிக்கப்பட்டுள்ளார். இவர் 1984ம் ஆண்டு நடந்த மிஸ் அலாஸ்கா போட்டியில் 2வது இடம் பெற்றவர் என்பது குறிப்பிடத்தக்கது.

ஒரு பெண்ணை வேட்பாளராக நிறுத்தியதன் மூலம் ஜான் மெக்கெய்ன் புத்திசாலித்தனமாக செயல்பட்டுள்ளார் என்று கூறப்படுகிறது. காரணம், துணை அதிபர் வேட்பாளராக ஹில்லாரியை ஓபாமா தேர்வு செய்வார் என்று எதிர்பார்க்கப்பட்ட நிலையில் அவர் பிடனை தேர்வு செய்தார். இதனால் பெண் வேட்பாளர்களிடையே அதிருப்தி நிலவியது. இதை பயன்படுத்திக் கொண்டு வாக்குகளைப் பெறும் நோக்கில்தான் சாராவை மெக்கெய்ன் தேர்வு செய்திருப்பதாக கூறப்படுகிறது.

குறிப்பாக ஹில்லாரி ஆதரவாளர்களை தம் பக்கம் ஈர்க்க முடியும் என்பதே மெக்கெய்னின் கணக்கு.

நேற்று ஓஹியோவின் டேய்டன் நகரில் நடந்த தனது 72வது பிறந்த நாள் விழாவின்போது சாராவின் பெயரை மெக்கெய்ன் அறிவித்தார்.

44 வயதாகும் சாரா பாலின், 1984ம் ஆண்டு நடந்த மிஸ் அலாஸ்கா போட்டியில் 2வது இடத்தைப் பிடித்தவர். இப்போது அலாஸ்கா மாகாண ஆளுநராக இருக்கிறார். தேசிய அளவில் அதிகம் அறியப்படாதவர்.

5 குழந்தைகளுக்குத் தாயான சாரா பலின், கன்சர்வேட்டிவ் ஆவார். எந்தவித குற்றம் குறையும் இவர் மீது இதுவரை இல்லை. கிளீன் இமேஜ் கொண்டவர். ஊழல்களுக்கு எதிராக கடுமையாக நடந்து கொள்பவர்.

ஆளுநராவதற்கு முன்பு ஹாக்கி வீராங்கனையாகவும் இருந்துள்ளார் சாரா. மேலும், வசில்லா நகர மேயராகவும் பதவி வகித்தார். இதழியல் துறையில் பட்டம் பெற்றவரும் கூட.

சாராவின் நியமனத்தை ஜனநாயகக் கட்சியினர் முதல் பல தரப்பினரும் பாராட்டியுள்ளதால் ஓபாமா தரப்பு சற்றே கவலையுடன் கவனிக்கத் தொடங்கியுள்ளது.