வைத்திலிங்கம் அமைச்சரவையில் ரங்கசாமி மருமகன்

புதுச்சேரி: புதுச்சேரியின் முன்னாள் முதல்வர் ரங்கசாமியின் மருமகன் நமச்சிவாயம், புதிதாக ஆட்சி அமைக்க உள்ள வைத்திலிங்கத்தி்ன் அமைச்சரவையி்ல இடம் பெறுகிறார்.

புதுச்சேரி முதல்வராக இருந்த ரங்கசாமி ராஜினாமா செய்ததையடுத்து புதிய முதல்வராக வைத்திலிங்கம் தேர்வு செய்யப்பட்டுள்ளார். தனது அமைச்சரவையில் இடம்பெற போகும் அமைச்சர்கள் குறித்து டெல்லியில் கட்சி தலைமையுடன் வைத்திலிங்கம் நேற்று ஆலோசனை நடத்தினார். அவர் தந்த அமைச்சர்கள் பட்டியலுக்கு கட்சி மேலிடம் ஒப்புதல் அளித்தது.

ரங்கசாமி அமைச்சரவையில் ஏற்கனவே அமைச்சர்களாக இருந்த வல்சராஜ், மல்லாடி கிருஷ்ணாராவ், கந்தசாமி, ஷாஜகான் ஆகியோர் புதிய அமைச்சரவையில் மீண்டும் இடம் பெற்றுள்ளனர்.

மேலும் புதிய அமைச்சராக உழவர்கரை தொகுதி காங்கிரஸ் எம்எல்ஏ நமச்சிவாயமும் இடம் பெற்றுள்ளார்.

இவர் முன்னாள் முதல்வர் ரங்கசாமியின் மருமகன் (அண்ணன் மகளை மணந்தவர்) ஆவார். வன்னியர் சமுதாயத்துக்கு பிரதிநிதித்துவம் அளிக்க வேண்டும் என்ற அடிப்படையில் நமச்சிவாயத்துக்கு அமைச்சர் பதவி வழங்கப்பட்டுள்ளதாக கூறப்படுகிறது.

ரங்கசாமிக்கு எதிராக அமைச்சர்கள் போர்க் கொடி உயர்த்தியபோது அமைச்சர்களுக்கு ஆதரவாக நமச்சிவாயம் செயல்பட்டார் என்பதும் குறிப்பிடத்தக்கது. புதிய அமைச்சர்களின் பட்டியலை ஆளுநரிடம் வைத்திலிங்கம் இன்று முறைப்படி வழங்கினார். இந்த பட்டியல் மத்திய உள்துறை அமைச்சகத்துக்கு அனுப்பிவைக்கப்பட்டு ஒப்புதல் பெறப்படும்.

புதிய அமைச்சரவை வரும் 4ம் தேதி பதவி ஏற்க உள்ளது.