பிரதமருடன் அமெரிக்க தூதர் முல்போர்ட் சந்திப்பு

டெல்லி: அமெரிக்க அணு சக்தி ஒப்பந்தம் தொடர்பாக எழுந்துள்ள புதிய புயலின் பின்னணியில், பிரதமர் மன்மோகன் சிங்கை, அமெரிக்க தூதர் டேவிட் முல்போர்ட் இன்று சந்தித்துப் பேசினார். அப்போது அமெரிக்காவின் நிலை குறித்து இருவரும் விவாதித்தனர்.

அணு சக்தி ஒப்பந்தம் தொடர்பாக வாஷிங்டன் போஸ்ட் வெளியிட்டுள்ள கடிதம் பெரும் சர்ச்சையை ஏற்படுத்தியுள்ளது. இதுகுறித்து இந்தியாவில் எதிர்க்கட்சிகள் வரிந்து கட்டிக் கொண்டு களம் இறங்கியுள்ளன.

இந்த நிலையில், இன்று காலை பிரதமர் மன்மோகன் சிங்கை, முல்போர்ட் சந்தித்துப் பேசினார். அப்போது என்ன பேசப்பட்டது என்ற விவரம் வெளியிடப்படவில்லை. ஆனால் அணு சக்தி ஒப்பந்தம் தொடர்பாக அமெரிக்கா புதிய நிபந்தனை எதையும் விதிக்கவில்லை என்பதை முல்போர்ட், பிரதமரிடம் விளக்கியதாக தெரிகிறது.

முல்போர்ட் - மன்மோகன் சிங் சந்திப்பில் எந்த விசேஷமும் இல்லை. அணு சக்தி ஒப்பந்தம் தொடர்பாக அமெரிக்க, இந்திய தலைவர்களுடன் தொடர்ந்து தகவல் பரிமாற்றம் நடந்து வருகிறது. அதுபோலத்தான் இதுவும் என அமெரிக்கா விளக்கம் அளித்துள்ளது.