கால்பந்து ரேங்கிங்-151வது இடத்தில் இந்தியா

டெல்லி: சர்வதேச கால்பந்து தரவரிசைப் பட்டியலில் இந்தியா 2 படி முன்னேறி 151வது இடத்தைப் பிடித்துள்ளது.

சர்வதேச அளவில் புகழ் பெற்று விளங்கும் கால்பந்து போட்டி இந்தியாவிலும் சற்று பிரபலமாகவே உள்ளது. கிரிக்கெட் பிரபலத்தைத் தாண்டி பல்வேறு விளையாட்டுக்கள் புகழ் பெறத் தொடங்கியுள்ளதைப் போல கால்பந்தும் தற்போது கவனிப்புக்குள்ளாகியுள்ளது.

அதிலும், சமீபத்தில் நடந்த ஆசிய கோப்பை சாலஞ்சர் போட்டியில் இந்தியா சாம்பியன் பெற்றதைத் தொடர்ந்து இந்திய கால்பந்து ரசிகர்கள் உற்சாகமடைந்துள்ளனர்.

தற்போது இந்த வெற்றி சர்வதேச கால்பந்துக் கழகத்தின் தரவரிசைப் பட்டியலிலும் எதிரொலித்துள்ளது.

தரவரிசைப் பட்டியலில் இந்தியா இதுவரை 153வது இடத்தில் இருந்து வந்தது. ஆசிய கோப்பை சாம்பியன் பட்டத்தை வென்றதைத் தொடர்ந்து 35 புள்ளிகள் இந்தியாவுக்கு கூடுதலாக கிடைத்து 151வது இடத்திற்கு முன்னேறியுள்ளது.

இப்பட்டியலில் ஸ்பெயினுக்கு (1565 புள்ளிகள்) முதலிடம் கிடைத்துள்ளது. 2வது இடத்தை இத்தாலியும், 3வது இடத்தை ஜெர்மனியும் பெற்றுள்ளன.

பிரேசில் அணிக்கு 6வது இடமே கிடைத்துள்ளது. அதன் பரம வைரியான அர்ஜென்டினா 7வது இடத்திற்குத் தள்ளப்பட்டுள்ளது.