ஜர்தாரி இன்று பதவியேற்பு-கர்ஸாய் பங்கேற்பு

இஸ்லாமாபாத்: பாகிஸ்தானின் புதிய அதிபராக ஆசிப் அலி ஜர்தாரி இன்று பதவியேற்கிறார். இந்த விழாவில் ஆப்கானிஸ்தான் அதிபர் ஹமீத் கர்ஸாய் கலந்து கொள்கிறார்.

அதிபர் மாளிகையில் நடக்கும் பதவியேற்பு விழாவில் தலைமை நீதிபதி அப்துல் ஹமீது தோகர், ஜர்தாரிக்கு பதவிப் பிரமாணம் செய்து வைக்கிறார். விழாவில் ஆப்கானிஸ்தான் அதிபர் ஹமீத் கர்ஸாய் சிறப்பு விருந்தினராக கலந்து கொள்கிறார்.

கூட்டணியில் சேர நவாஸ் மீண்டும் மறுப்பு:

இந்நிலையில் அதிபராக தேர்வு செய்யப்பட்டதற்கு ஜர்தாரியை சந்தித்து வாழ்த்து தெரிவித்தார் பாகிஸ்தான் முஸ்லீம் லீக் கட்சியின் தலைவர் நவாஸ் ஷெரீப். அப்போது கூட்டணியில் சேர நவாஸூக்கு ஜர்தாரி மீண்டும் அழைப்பு விடுத்தார். ஆனால் அதற்கு நவாஸ் மறுத்துவிட்டார்.

எதிர்கட்சியாக இருந்து ஜனநாயகத்தை வலுபடுத்தும் வகையில் செயல்படப்போவதாக நவாஸ் கூறியுள்ளார். இந்த சந்திப்பின்போது அதிகம் அரசியல் பேசப்படவில்லை என்று பிஎம்எல் கட்சியின் தலைவர் அஷன் இக்பால் தெரிவித்தார்.

இன்று நடக்கும் பதவியேற்பு நிகழ்ச்சியில் நவாஸ் கலந்து கொள்ளவில்லை. லண்டனின் ஆபரேஷன் செய்யப்பட்டு சிகிச்சை பெற்று வரும் மனைவியை பார்ப்பதாற்காக நவாஸ் லண்டன் செல்கிறார்.

அடுத்த 6 நாட்களுக்கு பாகிஸ்தானில் அவர் இருக்கமாட்டார். அதனால் முன் கூட்டியே ஜர்தாரியை சந்தித்து வாழ்த்து தெரிவித்தார் என்று இக்பால் தெரிவித்தார்.