மதவெறி வீடியோ கேம்: முஸ்லீம்கள் கொந்தளிப்பு

இஸ்லாமாபாத்: அமெரிக்க ராணுவ வீரர், முஸ்லீம்களை படுகொலை செய்வதைப் போன்ற கம்ப்யூட்டர் கேம் பாகிஸ்தானிலும், உலக முஸ்லீம்கள் மத்தியிலும் பெரும் கொந்தளிப்பை ஏற்படுத்தியுள்ளது.

முஸ்லீம் மஸ்ஸாக்கர் என்று பெயரிடப்பட்டுள்ள இந்த வீடியோ கேம், ஒரு அமெரிக்கரால் வடிவமைக்கப்பட்டுள்ளது. பென்டகன் மற்றும் நியூயார்க் இரட்டை கோபுரம் மீதானதீவிரவாதத் தாக்குதலின் நினைவு நாளையொட்டி இந்த வீடியோ கேம் வெளியிடப்பட்டுள்ளது.

இணையத் தளத்திலிருந்து இலவசமாக டவுன்லோடு செய்யும் வகையில் இந்த வீடியோ கேம் புழக்கத்தில் விடப்பட்டுள்ளது.

இந்த வீடியோவை உருவாக்கிய அமெரிக்கர் தனது பெயர் எரிக் சிக்விடிர் வாக் என தெரிவித்துள்ளார். 22 வயதாகும் இவர் ஆஸ்திரேலியாவில் வசிப்பதாகவும் தெரிவித்துள்ளார்.

உலகில் ஒரு முஸ்லீம் ஆணும், பெண்ணும் உயிருடன் இருக்கக் கூடாது என்பதுதான் இந்த வீடியோ கேமின் குறிக்கோளாம்.

இந்த வீடியோ கேமில் ஒரு அமெரிக்க ராணுவ வீரர், மெஷின் கன் மற்றும் ராக்கெட் லாஞ்சருடன் தோன்றுகிறார். பாராசூட் மூலம் மத்திய கிழக்கு பகுதிக்கு இவர் அனுப்பப்படுகிறார்.

அங்கு முஸ்லீம் நாடுகளின் பாரம்பரிய உடையில் பலர் கைகளில் விதம் விதமான துப்பாக்கிகளுடன் காணப்படுகின்றனர். அவர்களை இந்த அமெரிக்க வீரர் கண்மூடித்தனமாக சுட்டுக் கொல்வது போல கேம் உள்ளது.

இந்த இனவெறி வீடியோ கேமுக்கு உலகெங்கிலிருமிருந்து கடும் கண்டனங்களும், எதிர்ப்புகளும் கிளம்பியுள்ளன. இங்கிலாந்தைச் சேர்ந்த முன்னணி முஸ்லீம் அமைப்பான ரமதான் பவுண்டேஷன் கடும் கோபத்தை வெளிப்படுத்தியுள்ளது.

அதேபோல பாகிஸ்தானிலும் இந்த வீடியோ கேம் கடும் கொந்தளிப்பை ஏற்படுத்தியுள்ளது. இது மிகவும் மோசமான ரசனையாகும். இப்படி ஒரு கேமை எந்த நிறுவனம் ஸ்பான்சர் செய்தது என்று தெரியவில்லை என்று சமீர் என்ற பாகிஸ்தானியர் கேட்டுள்ளார்.