கட்சி மாறி ஓட்டு-இன்னொரு சமாஜ்வாடி எம்பியின் பதவி பறிப்பு

டெல்லி: மக்களவையில் கடந்த ஜூலை மாதம் 22ம் தேதி மத்திய அரசின் மீது நடந்த நம்பிக்கை வாக்கெடுப்பில் கட்சியின் கொறடாவின் உத்தரவை மீறி அரசுக்கு எதிராக வாக்களித்த இன்னொரு சமாஜ்வாதி கட்சி எம்பியான சிங் பகலின் பதவி பறிக்கப்பட்டுள்ளது.

ஏற்கனவே இந்தக் கட்சியைச் சேர்ந்த ஜெய்பிரகாஷ் ராவத்தின் பதவி பறிக்கப்பட்டது குறிப்பிடத்தக்கது. இந் நிலையில் உத்தரபிரதேச மாநிலம் ஜலேசார் தொகுதியில் இருந்து தேர்ந்தெடுக்கப்பட்ட எஸ்.பி. சிங் பகலின் பதவியும் பறிக்கப்பட்டுள்ளது.

இதற்கான உத்தரவை சபாநாயகர் சோம்நாத் சாட்டர்ஜி பிறப்பித்தார்.

பாகல் கடந்த மாதம் பகுஜன் சமாஜ் கட்சியில் சேர்ந்தது குறிப்பிடத்தக்கது.