'காதலில் விழுந்தேன்'-மதுரையில் அழகிரியால் சிக்கல்!

மதுரை: சன் டிவி குழுமத்தின் சன் பிக்சர்ஸ் நிறுவனம் தயாரித்துள்ள காதலில் விழுந்தேன் படத்தை மதுரையில் திரையிடுவதற்கு மு.க.அழகிரியின் பெயரைச் சொல்லி சிலர் தடுப்பதாக புகார் எழுந்துள்ளது.

சன் டிவி குழுமத்திலிருந்து உதயமாகியுள்ள திரைப்பட தயாரிப்பு நிறுவனம்தான் சன் பிக்சர்ஸ். இந்த நிறுவனம் காதலில் விழுந்தேன் படத்தை முழுமையாக வாங்கி உலகெங்கும் வினியோகித்துள்ளது.

இதுதவிர ஜீவா நடிக்கும் சிவா மனசுல சக்தி உள்ளிட்ட பல படங்களையும் சன் பிக்சர்ஸ் தயாரிக்கிறது.

இந் நிலையில் 'நாக்க மூக்கா' பாட்டின் மூலம் பெரும் எதிர்பார்ப்பை ஏற்படுத்தியுள்ள காதலில் விழுந்தேன் படம் இன்று தமிழகம் முழுவதும் திரைக்கு வந்துள்ளது. நடிகை தேவயானியின் தம்பியான நகுல் ஹீரோவாக நடிக்க அவருக்குஜோடியாக சுனைனா நடித்துள்ளார்.

இப்படத்திற்கு மதுரையில் சிக்கல் எழுந்துள்ளதாம். மதுரையில் 9 தியேட்டர்களில் படத்தை திரையிட முடிவாகியிருந்தது. ஆனால் இன்று எந்தத் தியேட்டரிலும் படம் திரையிடப்படவில்லை.

இதுகுறித்து தியேட்டர் உரிமையாளர்கள் தரப்பில் கூறுகையில், மு.க.அழகிரி பெயரைச் சொல்லி சிலர் மிரட்டுகிறார்கள். படத்தைத் திரையிடக் கூடாது என எச்சரிக்கின்றனர். எனவேதான் படத்தை திரையிடுவதை தவிர்த்துள்ளோம் என்று கூறியுள்ளனராம்.

இதுகுறித்து காவல்துறையில் புகார் கூறியும், ஒரு நடவடிக்கையும் இல்லை என சன் பிக்சர்ஸ் தரப்பில் தெரிவிக்கப்பட்டுள்ளது.

ஏற்கனவே சன் டிவி சானல்களை பார்க்க விடாமல் மு.க.அழகிரியின் ராயல் கேபிள் விஷன் தடுப்பதாக சன் டிவி குற்றம் சாட்டி வருகிறது. இந்த நிலையில் சன் பிக்சர்ஸ் படத்தையும் தடுக்க முயற்சி நடந்துள்ளது.