ரஜினியை வீடு தேடிச் சென்று சந்தித்த அத்வானி
வரும் நாடாளுமன்றத் தேர்தலில் பிரதமர் பதவிக்கான வேட்பாளராக அறிவிக்கப்பட்டுள்ள எல்.கே.அத்வானி இன்று சென்னை வந்தார். அவர் எழுதியுள்ள 'எனது நாடு, எனது வாழ்க்கை' (My country; M life) என்ற தலைப்பில் அவர் எழுதிய சுயசரிதையின் தமிழ் பதிப்பு வெளியீட்டு விழா இன்று நடந்தது.
இந்த விழாவில் பங்கேற்க வேண்டும் என ரஜினிக்கு பாஜக அழைப்பு விடுத்திருந்தது. ஆனால் ரஜினி இதுகுறித்து பதில் ஏதும் அளிக்கவில்லை.
இந்த நிலையில் இன்று சென்னை வந்த அத்வானி திடீரென ரஜினிகாந்த்தின் வீட்டுக்குச் சென்றார். அத்வானியை, ரஜினி குடும்பத்தினர் வரவேற்று அழைத்துச் சென்றனர்.
பின்னர் ரஜினியும், அத்வானியும் சுமார் முக்கால் மணி நேரம் ஆலோசனை நடத்தினர். இந்த சந்திப்பு குறித்து பாஜக மற்றும் ரஜினி தரப்பில் எதுவும் தெரிவிக்கப்படவில்லை.
இருப்பினும் லோக்சபா தேர்தலில் பாஜகவுக்கு ஆதரவளிக்க வேண்டும் என ரஜினியிடம் அத்வானி கோரியதாக கூறப்படுகிறது.
ரஜினியை வீடு தேடிச் சென்று அத்வானி சந்தித்தது தமிழக அரசியல் வட்டாரத்தில் பரபரப்பை ஏற்படுத்தியுள்ளது.