முதலிடத்தில் சன் டிவி: லயோலா கல்லூரி சர்வே

சென்னை: தமிழ்த் தொலைக்காட்சிகளிலேயே மக்களால் அதிகம் பார்க்கப்படும், அதிகம் விரும்பப்படும் தொலைக்காட்சியாக சன் டிவியும், அதன் குழுமச் சானல்களும் திகழ்வதாக லயோலா கல்லூரி நடத்திய கருத்துக் கணிப்பில் தெரிவிக்கப்பட்டுள்ளது.

லயோலா கல்லூரியின் ஊடக அறிவியல் துறை இதுதொடர்பான கருத்துக் கணிப்பை சமீபத்தில் நடத்தியது. அதன் முடிவுகளை துறைத் தலைவர் பேராசிரியர் ராஜமாணிக்கம் செய்தியாளர்களிடம் வெளியிட்டார்.

அப்போது அவர் கூறுகையில், மாநிலம் மொத்தம் 3,025 பேரிடம் கருத்துக் கணிப்பு நடத்தப்பட்டது. அனைவரும் 18 வயதுக்கு மேற்பட்டவர்கள்.

கடந்த 2 மாதங்களாக இந்த சர்வே நடத்தப்பட்டது. இந்தக் கருத்துக் கணிப்பில், பெரும்பாலான மக்களின் விருப்ப சானலாக, பெரும்பாலானோர் பார்க்கும் சானலாக சன் குழுமச் சானல்கள் திகழ்கின்றன.

இதில் சன் டிவிக்கு 51 சதவீதம் பேரின் ஆதரவு கிடைத்துள்ளது. 2வது இடத்தில் கலைஞர் டிவி உள்ளது. இதற்கு 8.6 சதவீத ஆதரவு கிடைத்துள்ளது.

சன் குழுமத்தின் கே டிவி (7.5%), விஜய் டிவி (6.4%), பொதிகை (5.7%), சன் மியூசிக் (4.3%), ஜெயா டிவி (4.2%), சன் நியூஸ் (2.6%), மக்கள் டிவி (1.1%) என்ற வரிசையில் உள்ளன.

கருத்துக் கணிப்பில் கலந்து கொண்டவர்களில் அனைத்து அரசியல் கட்சிகளின் தொண்டர்களும் அடக்கம்.

சன் டிவியின் படைப்புகள், வித்தியாசமான நிகழ்ச்சிகள், பொழுதுபோக்கு நிகழ்ச்சிகள் தங்களைக் கவர்ந்திருப்பதாக பெரும்பாலானவர்கள் தெரிவித்தனர் என்றார்.