பெட்ரோல் விலை மேலும் குறைய வாய்ப்பு

டெல்லி: பெட்ரோல், டீஸல் விலை மேலும் குறைக்கப்படும் என மத்திய உள்துறை அமைச்சர் ப.சிதம்பரம் இன்று பாராளுமன்றத்தில் தெரிவித்தார்.

நிதித்துறைக்குப் பொறுப்பு வகிக்கும் பிரதமர் மன்மோகன் சிங் இன்று வராததால், அவருக்குப் பதில் நிதித்துறை துணைக் கேள்விகளுக்கு உள்துறை அமைச்சர் ப.சிதம்பரம் பதிலளித்தார்.

பெட்ரோல் விலை மேலும் குறையுமா என்ற கேள்விக்கு அவர் பதில் கூறுகையில், சர்வதேச சந்தையில் கச்சா எண்ணெயின் விலைப் போக்கை கவனித்து வருகிறோம். கச்சா எண்ணெய் விலை மேலும் குறையும்பட்சத்தில், பெட்ரோல், டீஸல் விலைகளும் குறைக்கப்படும், என்றார் ப.சிதம்பரம்.

இந்த மாத ஆரம்பத்தில் பெட்ரோல் விலை லிட்டருக்கு ரூ. 5 –ம், குறைக்கப்பட்டது. டீசல் ரூ.2 –ம் குறைக்கப்பட்டது. ஆனால் மேலும் ரூ.15 வரை பெட்ரோல் – டீஸலுக்கு விலைக் குறைப்பு செய்ய வேண்டும் என எதிர்க்கட்சிகள் வலியுறுத்தி வருகின்றன.