'ஜிஹாத்' நடத்த சிறார்களுக்குப் பயிற்சி அளிக்கும் அல் கொய்தா
டெல்லி: இளம் சிறார்களைத் தேர்வு செய்து அவர்களை புனிதப் போரில் (ஜிஹாத்) ஈடுபடுத்த அல் கொய்தா அமைப்பு தீவிரப் பயிற்சி அளித்து வருவதாக வீடியோ ஆதாரம் ஒன்று தெரிவிக்கிறது.
இதுதொடர்பான வீடியோ கிளிப்பிங் ஒன்று இந்திய செய்தி நிறுவனம் ஒன்றுக்குக் கிடைத்துள்ளது. அதில் இளம் சிறார்கள் குழு ஒன்று போர் வீரர்கள் உடையுடன், உடற்பயிற்சியில் ஈடுபடும் காட்சி உள்ளது.
நடுங்கும் குரலுடன் அவர்கள் கோஷமிட்டபடி பயிற்சி செய்வது, கயிறுகளின் மீது ஏறுவது உள்ளிட்டவை அதில் உள்ளன.
பயிற்சியின்போது அமெரிக்கா, இங்கிலாந்து மற்றும் அவர்களின் நேச நாடுகளை அழிப்போம் என்று கூச்சலிட்டபடி அவர்கள் பயிற்சி செய்கிறார்கள்.
இந்த வீடியோ எங்கு வைத்து எடுக்கப்பட்டது, பயிற்சி எங்கு நடக்கிறது என்ற விவரம் தெரியவில்லை.
அடுத்த தலைமுறை தீவிரவாதிகளை உருவாக்கும் முயற்சியாகவே சிறார்களைத் தேர்வு செய்து அவர்களை அல் கொய்தா பயிற்றுவிப்பதாக கூறப்படுகிறது.