கருணாநிதியுடன் ராமதாஸ் சந்திப்பு-கூட்டணி தொடரும்?

சென்னை: அறுவை சிகிச்சையைத் தொடர்ந்து மருத்துவமனையில் சிகிச்சை பெற்று வரும் முதல்வர் கருணாநிதியை டாக்டர் ராமதாஸ் திடீரென சந்தித்துப் பேசினார்.

போரூர் ராமச்சந்திரா மருத்துவமனையில் நடந்த இந்தச் சந்திப்பின்போது பாமக தலைவர் ஜி.கே.மணியும் உடனிருந்தார்.

அரை மணி நேரம் நடந்த இந்தச் சந்திப்பின்போது கருணாநிதியிடம் உடல்நிலை குறித்து ராமதாஸ் விசாரித்ததோடு கூட்டணி குறித்தும் பேசியதாகத் தெரிகிறது.

வரும் மக்களவைத் தேர்தலில் திமுக-காங்கிரஸ் கூட்டணியிலேயே பாமக நீடிக்க வேண்டும் என்று முதல்வர் தெரிவித்ததாகவும், தானும் அதையே விரும்புவதாகவும் ராமதாஸ் தெரிவித்ததாகவும் கூறப்படுகிறது.

மேலும் இச் சந்திப்பின்போது இலங்கையில் போர் நிறுத்தம் கோரி காங்கிரஸ் தலைவர் சோனியா, வெளியுறவு அமைச்சர் பிரணாப் முகர்ஜி ஆகியோரிடம் தந்த மனுவை கருணாநிதியிடம் ராமதாஸ் வழங்கினார்.

இது குறித்து சோனியாவுடன் பேசுவதாக கருணாநிதி உறுதியளித்தார்.

முன்னதாக அமைச்சர் ஸ்டாலின் தனது சகோதரர் மு.க.தமிழரசுடன் நேற்று காலை ராமதாஸை சந்தித்துப் பேசினார். அப்போது தமிழரசுவின் மகள் திருமண பத்திரிக்கையை ராமதாசிடம் வழங்கிய ஸ்டாலின், கூட்டணியில் பாமக நீடிக்க வேண்டும் என்றும் கோரிக்கை வைத்தார்.

இந்தச் சந்திப்பைத் தொடர்ந்தே முதல்வரை ராமதாஸ் மருத்துவனையில் சந்தித்தது குறிப்பிடத்தக்கது.