வீட்டுக் கடன் வட்டி -அரை சதவீதம் குறைத்த ஐசிஐசிஐ

மும்பை: ரிசர்வ் வங்கி பல்வேறு வட்டி விகிதங்களைக் குறைத்துள்ளதன் எதிரொலியாக, வீட்டுக் கடன்களுக்கான வட்டி விகிதத்தை மேலும் குறைத்துள்ளது ஐசிஐசிஐ வங்கி.

அதன்படி இந்த வங்கி இனி வழங்கும் வீட்டு கடன்களுக்கான வட்டி 0.25 சதவீதம் முதல் 0.50 சதவீதம் வரை குறைகிறது. இது உடனடியாக அமலுக்கு வருகிறது.

இதுகுறித்து, ஐ.சி.ஐ.சி.ஐ.,வங்கி செய்தி தொடர்பாளர் கூறியதாவது:

20 லட்ச ரூபாய்க்கு குறைவாக வாங்கும் வீட்டு கடன்களுக்கான வட்டி வீதம் இனி 9.75 சதவீதமாக இருக்கும். இதற்கு முன் இது 10 சதவீதமாக இருந்தது. 20 லட்சம் முதல் 30 லட்சம் வரையிலான கடன்களுக்கான வட்டி வீதம் 10.5 சதவீதத்தில் இருந்து 10 சதவீதமாக குறைக்கப்பட்டுள்ளது.

30 லட்ச ரூபாய்க்கு அதிகமாக வாங்கும் கடன்களுக்கான வட்டி வீதம் 12 சதவீதத்தில் இருந்து, 11.5 சதவீதமாகக் குறைக்கப்பட்டுள்ளது.

இந்த வட்டி வீதங்கள் குறைப்பு அனைத்தும் புதிய கடன்களுக்கு மட்டுமே பொருந்தும், என்று அவர் கூறியுள்ளார்.

இப்போதும் அதிகம்தான்!

ஆனால் இப்போதும் இந்த வட்டி விகிதம் மிக அதிகமான ஒனறாகவே பார்க்கப்படுகிறது. தப்போது ரிசர்வ் வங்கி வழங்கியுள்ள வட்டிச் சலுகைகள் மக்களை முழுமையாகப் போய்ச்சேர வேண்டுமானால் வணிக வங்கிகள் பல்வேறு கடன்களுக்கு 3.5 முதல் 5 சதவிகிதத்துக்குள்தான் வசூலிக்கப்பட வேண்டும்.

பல நுகர்வோர் கடன்களை வட்டியில்லாமல் வழங்கவும் ரிசர்வ் வங்கி பரிந்துரைத்துள்ளது. ஆனால் இதையெல்லாம் வணிக வங்கிகள் காதிலேயே போட்டுக் கொண்டதாகத் தெரியவில்லை.