வேலை-மோசமான நகரங்கள் வரிசையி்ல் சென்னை
டெல்லி: உலகில் வேலை பார்ப்பதற்கு மோசமான சூழ்நிலைகளைக் கொண்ட நகரங்களின் வரிசையில் சென்னை, மும்பை, டெல்லி ஆகியவை இடம் பெற்றுள்ளன.
சர்வதேச ஆலோசனைக் கழகம் என்ற அமைப்பு இது தொடர்பான கருத்துக் கணிப்பை நடத்தி முடிவுகளை வெளியிட்டுள்ளது.
இதில் மும்பை நகருக்கு மோசமான நகரங்களின் வரிசையில் 5வது இடமும், 6வது இடத்தில் டெல்லியும், 10வது இடத்தில் சென்னையும் வருகின்றன.
பணியாற்றுவதற்கு மோசமான நகரம் என்ற பெயரை நைஜீரியாவின் லாகோஸ் நகரம் பெற்றுள்ளது. இரண்டாவது இடத்தை ஜகார்த்தா பெறுகிறது.
இந்த கருத்துக் கணிப்பில் வட அமெரிக்க, ஐரோப்பிய நகரங்களை சேர்த்துக் கொள்ளவில்லை. அதேபோல, போர் நடைபெறும் நகரங்கள், சர்வதேச அளவில் தனிமைப்படுத்தப்பட்டுள்ள நாடுகளையும் கருத்துக் கணிப்பில் சேர்த்துக் கொள்ளவில்லை.
மும்பை ஏன் மோசம்...?
மும்பையில் சுற்றுச்சூழல் சீர்கேடு மோசமாக உள்ளதாம். நோய்ப் பரவல் அதிகமாம். சுகாதார சீர்கேடும் அதிகமாம். அடிப்படைக் கட்டமைப்பு போதுமானதாக இல்லை. அரசியல் ரீதியிலான வன்முறைகள் அதிகம், சுற்றுச்சூழல் சரியில்லை என்று கருத்துக் கணிப்பில் காரணங்கள் கூறப்பட்டுள்ளன.
டெல்லி...
டெல்லியில் வெப்ப நிலைதான் படு மோசம் என கருத்துக்கள் தெரிவிக்கப்பட்டுள்ளன. கோடை காலத்தில் அங்கு கடும் வெயில் நிலவுவதால் பணியாற்ற உக்ந்த நகரம் இல்லை என்று கூறியிருக்கின்றனர்.
அதேசமயம், டெல்லியில் மெட்ரோ ரயில் திட்டம் முழுமையாக நிறைவேற்றப்பட்டால் போக்குவரத்து நெரிசல் பெருமளவில் குறையும் என கருத்துக் கணிப்பில் கலந்து கொண்டவர்கள் தெரிவித்துள்ளனர்.
சென்னை ரொம்ப சூடு..
சென்னை நகரில் வெப்பம் அதிகம் என கருத்து தெரிவித்துள்ளனர். அதேபோல, சுற்றுச்சூழல் சீர்கேடு அதிகம், நோய்ப் பரவல் மிரட்டல்அதிகம். பல பகுதிகள் ரொம்ப தூரத்தில் இருப்பதால் போய் விட்டு திரும்ப நெடு நேரம் ஆவதும் ஒரு பின்னடைவாக கூறப்பட்டுள்ளது.