திண்டிவனத்திலிருந்து கள்ளக்குறிச்சிக்கு மாறிய தன்ராஜ்

கள்ளக்குறிச்சி: திண்டிவனம் தொகுதியில் கடந்த தேர்தலில் போட்டியிட்ட பாமகவின் தன்ராஜ், முதல் முறையாக கள்ளக்குறிச்சிக்கு இடம் பெயர்ந்து வருகிறார்.

திண்டிவனம் தொகுதி, மறு சீரமைப்பின் கீழ் ரத்து செய்யப்பட்டு விட்டது. இதையடுத்தே கள்ளக்குறிச்சிக்கு வருகிறார் தன்ராஜ்.

திண்டிவனம் தொகுதி எம்.பியாக மக்களிடையே நல்ல பெயர் சம்பாதித்து வைத்திருந்தார். இருப்பினும் தற்போது கள்ளக்குறிச்சிக்கு மாறி வர வேண்டிய நிலை.

பாமக நிறுவனர் டாக்டர் ராமதாஸின் உறவினர் என்பது ஒருபுறம் இருந்தாலும், தனது தொகுதி மக்களிடம் நல்ல பெயரை சம்பாதித்து வைத்துள்ளார் தன்ராஜ்.

கட்சியினர் மத்தியிலும் இவருக்கு நல்ல பெயர் உள்ளது. சமீபத்தில் தனது பிரசாரத்தை வித்தியாசமான முறையில் தொடங்கினார் தன்ராஜ்.

குடுகுடுப்பைக்காரர் வேடத்தில் தொகுதிக்குள் வலம் வந்த தன்ராஜ், நல்ல காலம் வரப் போகுது என்று கூறி வித்தியாசமான முறையில் மக்களிடையே பாமகவுக்கு ஆதரவு திரட்டி அனைவரையும் கவர்ந்தார்.

அதிமுகவுடன் இணைந்திருப்பதால் கிடைத்துள்ள கூடுதல் பலம், டாக்டர் ராமதாஸின் சொந்த செல்வாக்கு, வன்னியர் ஜாதி பலம் உள்ளிட்டவற்றை நம்பி கள்ளக்குறிச்சிக்கு வந்துள்ளார் தன்ராஜ்.

திமுக அணியில் கள்ளக்குறிச்சி தொகுதியில் திமுகவே போட்டியிடுகிறது.

வெற்றி தேவதை யார் பக்கம் என்பதை பொறுத்திருந்துதான் பார்க்க வேண்டும்.