பிரியங்கா காந்தியின் மாமனார் தூக்குப் போட்டுத் தற்கொலை

டெல்லி: காங்கிரஸ் தலைவர் சோனியா காந்தியின் மகள் பிரியங்கா காந்தியின் மாமனார் ராஜீந்தர் வதேரா டெல்லியில் உள்ள விருந்தினர் இல்லம் ஒன்றில் தூக்கில் பிணமாக தொங்கினார். அவர் தற்கொலை செய்து கொண்டதாக போலீஸார் தெரிவித்துள்ளனர்.

ராஜீந்தர் வதேரா தெற்கு டெல்லியில் ஹாஸ்காஸ் பகுதியில் உள்ள சிட்டி இன் என்ற விருந்தினர் இல்லத்தில் சில மாதங்களாக தங்கியிருந்தார். சூப்பர் ஸ்பொஷிலிட்டி மாக்ஸ் மருத்துவமனையில் கல்லீரல் பிரச்சினை காரணமாக சிகிச்சை பெற்று வந்தார்.

இந்த நிலையில் நேற்று காலை அவர் தனது அறையில் தூக்கில் தொங்கியதைப் பார்த்த அறை வேலையாள் உடனடியாக மற்றவர்களை அழைத்தார்.

கழுத்தில் துணிக் கயிற்றை சுற்றி மின்விசிறியில் தூக்குப் போட்டு தற்கொலை செய்து கொண்டுள்ளார் ராஜீந்தர் வதேரா.

சாகேத்தில் உள்ள தனியார் மருத்துவமனைக்கு அவரைக் கொண்டு சென்றனர். ஏற்கனவே வதேரா இறந்து விட்டதாக அங்கு டாக்டர்கள் தெரிவித்தனர்.

அவருடைய உடல் சப்தர்ஜங் மருத்துவமனைக்கு பிரேதப் பரிசோதனைக்காக அனுப்பி வைக்கப்பட்டது. பிரேதப் பரிசோதனைக்குப் பின்னர் அவரது மகனும், பிரியங்காவின் கணவருமான ராபர்ட் வதேராவிடம் உடல் ஒப்படைக்கப்பட்டது.

உடனடியாக லோதி சாலை சுடுகாட்டில் உடல் தகனமும் நடைபெற்றது.

உ.பி. மாநிலம் மொராபாதாத்தில் வசித்து வந்தார் வதேரா. கைவினைப் பொருள் வர்த்தகத்தில் அவர் ஈடுபட்டிருந்தார்.

எட்டு வருடங்களுக்கு முன்பு தனது தந்தைக்கும், அண்ணன் ரிச்சர்ட் வதேராவுக்கும், வக்கீல் நோட்டீஸ் அனுப்பினார் ராபர்ட் வதேரா. அதில், தனது பெயரையும், பிரியங்காவின் பெயரையும் பயன்படுத்தி தனக்கு வேண்டியவர்களை உ.பி. மாநில காங்கிரஸிலும், மொராதாபாத் மாவட்ட காங்கிரஸிலும் பதவிகளைப் பெற முயற்சிப்பதாகவும், இதை நிறுத்தாவிட்டால் நடவடிக்கை எடுக்கப்படும் எனவும் எச்சரித்திருந்தார் ராபர்ட்.

அப்போது முதலே ராபர்ட்டுக்கும், அவரது தந்தைக்கும் இடையே பிணக்கு இருந்து வந்தது. மேலும் தனது குடும்பத்தை விட்டும் பிரிந்து தனியாக வாழ்ந்து வந்தார் ராஜீந்தர் வதேரா.

மேலும், தனது மகன் பிரியங்கா காந்தியை திருமணம் செய்தது தாங்கள் யாருக்குமே பிடிக்கவில்லை என்றும் ஒருமுறை பேட்டியில் தெரிவித்திருந்தார் ராஜீந்தர் என்பது குறிப்பிடத்தக்கது.

சில ஆண்டுகளுக்கு முன்புதான் ராஜீந்தரின் மகள் மிஷல் கார் விபத்தில் பலியானார் என்பது நினைவிருக்கலாம்.